FAKTET/ Kush fshihet pas “Magjistares” Erinda Lutaj që do ndërtojë kullën me 35 kate në Laprakë. Lidhjet me Frida Krifcën dhe grupet e Vlorës
Një javë pas deklaratës, se do ndërtohen më shumë kulla në Tiranë, Edi Rama firmosi lejet për 11 kulla të tjera, një ndër të cilat është leja për kullën “Top Seven Tower” me 35 kate në Laprakë, etiketuar si “Kulla e Lutajve” ku nuse është Frida Krifca, ish-drejtoresha e 135 milionë Eurove të zhdukura, që BE i solli për fermerët e Shqipërisë.
Edhe Lutajt kanë të drejtë të merren me biznes ndërtimi, por në këtë leje kulle, ka diçka që nuk shkon logjikisht si vlerë investimi, ligjërisht si e drejtë për leje ndërtimi e penalisht si burim financimi, sepse lejes i mungojnë deklarimet e burimeve financiare që llogariten në 80 milion Euro.
Sepse aktualisht, kjo firmë është krijuar më 9 qershor 2023 nga Erinda Lutaj, ndërsa pas 3 muajsh nga krijimi, ka dorëzuar kërkesën në Këshillin Kombëtar të Territorit dhe në Bashkinë e Tiranës, për të marrë lejen e kësaj kulle.
Sipas dosjes tatimore, kjo firmë ka vetëm 1 milion lekë kapital, të cilat, sipas deklarimit të administratorit Bledi Shkëmbi, i ka marrë borxh me këste nga 8300 lekë në muaj prej kompanisë “Top Seven Sh.p.k”.
Aktualisht, kompania e Lutajve “Top Seven Construction Sh.p.k” që do financojë dhe ndërtojë kullën me vlerë 80 milionë Euro, ka vetëm 3 punëtorë dhe ka deklaruar 960 milionë humbje, ndërsa pronarja Erinda Lutaj, rezulton kliente “në kërkim” nga bankat, për 3 kredi të pa shlyera në vlerë totale 192 milionë lekë, marrë në emër të firmës tjetër “Top Seven Sh.p.k”.
Më 19 shkurt 2024, zyra përmbarimore “A.Vako” me Urdhër Nr. 100 Prot. e Dosje Nr. 1869, i vendosi ndërtueses së kullës, Erinda Lutaj, sekuestro 100% të aksioneve të firmës “Top Seven Sh.p.k”; por brenda 24 orësh, më 20 shkurt 2024, sekuestro iu hoq me ndërhyrje nga lart.
Mund të thuhet, se financimin e kullës 35 kate të Lutajve, do ta bëjë kompania e tyre “Top Seven Sh.p.k”, por dhe kjo ka 98 milionë lekë kapital, ndërsa vlera e investimit është 80 milionë Euro; veçse nëse do përdoren dhe milionat që ka zhvatur nusja e tyre Frida Krifca nga fondet e BE.
Nga të dhënat që ka siguruar “Pamfleti” nga anti-krimi në Vlorë e në Tiranë, zbulojnë se prapa emrit të Erinda Lutajt që ka marrë lejen për ndërtimin dhe investimin e kësaj kulle bashkë me Lutajt e Frida Krifcës, qëndron banda e Vlorës “Orgest Birçaj” e trafikut ndërkombëtar të drogës me qendër në Spanjë e Dubai, një prej të cilëve (Bledar Birçaj) u vra më 10 maj 2021 në Vlorë për pazare të prishuara.
Saktësojmë, se deri më 15 janar 2021, krye-trafikanti Orgest Birçaj ka qenë administrator i kompanisë “Top Seven Sh.p.k”, ndërsa aktualisht figuron Drejtor Shitjesh me pagë mujore 1.2 milionë lekë në këtë kompani, por “de facto” është drejtuesi dhe financuesi i saj kryesor./ Marrë me shkurtime nga Pamfleti
