Kursi i kembimit , Euro zbret në kufijtë e 99 lekëve, paratë e kokainës përmbytin tregun
Euro vijon trendin rënës prej disa muajsh duke shkuar gjatë dy ditëve të fundit në kufijtë e 99 lekëve.
Të dhënat më të fundit nga tregu raportojnë se një euro u këmbye sot me 99.25 lekë, ndërkohë që dje u këmbye me 99.24 lekë.
Korrieri mëson se këy është niveli më i ulët historik I kursit të këmbimit mes euros dhe lekut duke konfirmuar se vendi është përmbytur nga paratë e kokainës, të cilat po pastrohen masivisht kryesisht në ndërtime kullash, pallatesh dhe fshatrash turistik në jug.
Monedha europiane ka qëndruar gjatë gjithë muajit shtator poshtë nivelit të 100 lekëve, ndërkohë që ka ndjekur një prirje të ngadaltë rënëse gjatë gjithë muajit. Rënia vjetore e euros po përshpejtohet gjithashtu dhe monedha europiane këmbehet sot në rënie me 6.4% krahasuar me të njëjtën ditë të vitit të kaluar.
Oferta e lartë dhe e qëndrueshme e monedhës europiane në tregun valutor po bën që euro të bjerë edhe në një periudhë të vitit kur tendencat historike janë karakterizuar nga një rimëkëmbje e kursit të euros, pas rënies sezonale të verës. Megjithatë, në vitet e fundit është e qartë se rënia e euros nuk është një fenomen i kufizuar sezonal në muajt e pushimeve verore. Kjo mund të shpjegohet me shpërndarjen në kohë të turizmit pothuajse gjatë gjithë vitit, prurjet e mëdha valutore që kanë qëllim investimet në pasuri të paluajtshme dhe me flukset e valutës nga burime informale.
Edhe Banka e Shqipërisë duket se tashmë ka hequr dorë nga përpjekjet për ta mbajtur kursin nën kontroll nëpërmjet ndërhyrjeve direkte, duke pranuar edhe rënien nën kufirin simbolik të 100 lekëve. Rënia e euros është ndjekur edhe nga shumica e valutave të tjera. Dollari amerikan ka rënë përsëri poshtë kufirit të 90 lekëve dhe këmbehej të premten me 89.64 lekë. Paundi britanik humbi gjithashtu terren dhe u këmbye me 117.85 lekë.
Të dhënat e bilancit të pagesave nuk ofrojnë një tablo të prurjeve valutore në kohë reale. Gjatë tremujorit të dytë, deficit i llogarisë korrente shënoi një përmirësim të lehtë, por bilanci i 6-mujorit të parë të vitit ngelet në përkeqësim të ndjeshëm krahasuar me vitin e kaluar, me një deficit të llogarisë korrente në nivelin më të lartë që prej vitit 2020.
Sidoqoftë, ku deficit vazhdon të mbulohet nga vlerat e larta të investimeve të huaja direkte, që për 6-mujorin arritën një vlerë të ri rekord, prej 749 milionë eurosh dhe kaluan me rreth 30% vlerën e deficitit të llogarisë korrente. Një tregues tjetër që dëshmon ofertën e lartë valutore në treg është rritja e këmbimeve në tremujorin e dytë të vitit me 30% më shumë krahasuar me një vit më parë./Korrieri
