Albaphoto , kompania pronare e klubit Vllaznia përjashtohet 2 vite nga tenderat
Agjencia e Prokurimit Publik (APP) ka përjashtuar kompaninë e pajisjeje mjekësore, “Albaphoto”, nga e drejta për të marrë pjesë në tendera publikë për një periudhë 2-vjeçare.
Vendimi është marrë në datë 25 Nëntor 2024 dhe ai është në fuqi deri në të njëjtën datë të vitit 2026.
Në Buletin e Prokurimeve Publike të datës 2 Dhjetor 2024 është paraqitur njoftimi “Operatori ekonomik i regjistruar në Qendrën Kombëtare të Regjistrimit me emër ‘Albaphoto’, me nipt K 86618008 S, përjashtohet për një periudhë 2-vjeçare”. “Boldnews.al” kreu verifikimet në rubrikën përkatëse në faqen e Agjencisë së Prokurimit Publik për të mësuar më shumë mbi shkeljet e kryera nga “Albaphoto”. Për neglizhencë ose lapsus, deri në momentin e publikimit të këtij shkrimi, APP nuk e ka shpallur ende vendimin e saj të plotë, megjithëse e ka përmendur në Buletinin e Prokurimeve Publike.
Gjithsesi, fakti që kompania në pronësi të Alban Xhaferit është përjashtuar 2 vjet, një afat që është mbi mesataren e penalizimeve, lë të kuptohet se shkelja e kryr nga operatori ekonomik është e rëndë.
“Albaphoto”, 1 mln euro tendera
Shoqëria “Albaphoto” është në treg prej viti 2008 dhe aksioneri i saj i vetëm është Alban Xhaferi.
Aktiviteti kryesor i kompanisë është “Import-Eksport, Tregtim me shumicë e pakicë material foto….Shitje filmash për radio imazherinë X-Ray, kimikate X-Ray. Tregtim, montim, mirëmbajtje dhe riparim i aparaturave mjekësore…etj.
Në vitin 2022, shoqëria “Albaphoto” hyri gjithashtu edhe në tregun sportiv, kur bleu zyrtarisht 90 përqind të aksioneve të klubit të futbollit “Vllaznia” të Shkodrës. Pjesën tjetër të aksioneve, 10 përqind, e bleu “AL Invest”, e cila gjithashtu është në pronësi të Xhaferit.
Të dhënat zyrtare të Thesarit të Shtetit tregojnë se kompania “Albaphoto” ka arkëtuar mbi 1 milionë euro nga Buxheti, nëpërmjet tenderave të zhvilluar gjatë periudhës 2019-2024.
Sipas të dhënave të përmbledhura nga portali informativ “spending.data”, klientët kryesorë të “Albaphoto” janë Qendra Spitalore Universitare Tiranë, Spitali i Shkodrës, Instituti i Policisë Shkencore. Lista e institucioneve që kanë nënshkruar kontratë me “Albaphoto” vijon edhe me institucione të tjera publike, kryesisht shëndetësore.
Tenderat me “flamuj të kuq”
Referuar të dhënave publike, të renditura në portalin “open.procurement”, kompania ‘Albaphoto” rezulton se ka fituar të paktën 55 kontrata publike nga viti 2020 e në vijim.
Shumica absolute e këtyre procedurave, 49 të tilla, janë shënuar me “Flamur të kuq”, për mungesë konkurence. Për ekspertët e prokurimeve publike “një shënim me Flamur të Kuq është një fakt, ngjarje, ose grup i rrethanave ose informacione të tjera, që mund të tregojnë një shqetësim apo ekspozim dhe mbi rrezik potencial të pajtueshmërise ligjore për sjellje të paligjshme ose joetike të biznesit, veçanërisht në lidhje me praktika korruptive dhe mosrespektimit të ligjeve anti-korrupsion”./BoldNews
