Riatdhesimi i kryekomandantit libian, Njeim Osama Elmasry, i njohur si Almasri ka dërguar nën hetim kryeministren italiane, Giorgia Meloni. Almasri ka mbajtur postin e kreut të Policisë Gjyqësore Libinare, por u arrestua në Torino me një urdhër-arrest të prerë nga Gjykata Ndërkombëtare Penale. Edhe pse u arrestua, ai u lirua dhe u riatdhesua në Lib. “Krimet” që pretendohet se ka kryer Meloni, janë ndihmë ndaj një të arrestuari dhe “përvetësim”.
Po kush është “torturuesi i Mitigës” ndaj të cilit pritet një urdhër-arresti ndërkombëtar?
I akuzuar për krime kundër njerëzimit dhe krime lufte nga Gjykata Penale Ndërkombëtare, ai është përgjegjës për koordinimin, urdhërimin dhe kryerjen e vrasjeve, dhunës seksuale dhe torturës në burgun e Tripolit, veçanërisht në Mitiga, ku mbylli mijëra emigrantë që shpresonin të arrinin në Evropë. Faktet e pretenduara kundër tij dyshohet se janë kryer në Libi duke filluar nga viti 2015, shkruan rainews.
Almasri është pjesë e një grupi ushtarak islamik të quajtur Rada dhe ka drejtuar Institutin për Reformën dhe Rehabilitimin e Policisë Gjyqësore të Tripolit që nga viti 2021. Njeriu i besuar i kryekomandantit Abdel Raouf Kara, udhëheqësi i milicisë që kontrollon aeroportin dhe burgjet, filloi karrierën e tij ushtarake kundër forcave të Gaddafit dhe më pas kundër ISIS-it dhe më në fund kundër mercenarëve të Haftarit.
Ai ka qenë disa herë në Evropë vitet e fundit dhe gjithashtu në Itali, përpara se të kishte një urdhër arresti ndërkombëtar kundër tij. Kjo e fundit u zyrtarizua nga Gjykata Ndërkombëtare Penale më 18 janar. Ai me siguri i di detajet e marrëveshjeve mes Italisë dhe Libisë për emigrantët, marrëveshje që Italia filloi të nënshkruante në 2017 me qeverinë Gentiloni. Kryekomandanti akuzohet për vrasje, tortura dhe për menaxhim të trafikut të parave dhe kontrabandistëve që sjellin emigrantë në Evropë. Mandati për arrestimin e tij u lëshua më 18 janar.
Gjykata Ndërkombëtare Penale dhe akuzat
Gjykata Ndërkombëtare Penale është një gjykatë ndërkombëtare e krimeve me seli në Hagë, Holandë, dhe është përgjegjëse për ndjekjen penale të personave të akuzuar për krimet më të rënda ndërkombëtare, gjenocid dhe krime lufte.
Në vitin 2018, një raport nga Zyra e Kombeve të Bashkuara për të Drejtat e Njeriut e klasifikoi burgun e Mitigës si një “ferr”, duke përshkruar kushte dramatike: “2,600 burra, gra dhe fëmijë” të grumbulluar në hapësira të ngushta, pa akses në avokatë apo gjykata. Tortura dhe shkelje të tjera të të drejtave të njeriut raportohet në këto qendra.
Sipas gjyqtarëve të Gjykatës Ndërkombëtare Penale, të cilët bazohen në hetime nga shoqata të pavarura, dëshmitarë okularë dhe hetime gazetareske, Almasri është i përfshirë drejtpërdrejt, shpesh së bashku me njerëzit e tij, në abuzime sistematike, veçanërisht ndaj të burgosurve të akuzuar për krime fetare, ateizëm, krishterim apo homoseksualitet.
