Është liruar shtetasi Dod Gjoka, i marrë peng pak minuta më parë në një karburant të aksin Lezhë-Laç.
Menjëherë pasi autorët, të cilët besohet të jenë tre, e morën me forcë në makinë, policia u vu në ndjekje të tyre si dhe ngriti disa postblloqe.
Mësohet se autorët e kanë lënë Gjokën anës rrugës dhe kanë vijuar arratinë e tyre, ndonëse janë identifikuar tashmë.
Shtetasi Dod Gjoka është dërguar në spitalin e Lezhës. Dyshohet se pengmarrja ndodhi pas një sherri që autorët kishin me Gjokën.
Njoftimi i Policisë:
Rreth orës 14:30, në vendparkimin e automjeteve të një lokali në aksin rrugor “Lezhë-Milot”, dyshohet se gjatë një konflikti fizik, tre shtetas kanë dhunuar dhe më pas kanë marrë me forcë me automjet, shtetasin D. Gj., rreth 35 vjeç, banues në Lezhë.
Menjëherë pas marrjes së njoftimit, shërbimet e Policisë së Lezhës kanë ngritur pika kontrolli në përimetrin rrethues dhe në akset lidhëse, me qëllim kapjen e autorëve, të cilët janë identifikuar nga Policia, konkretisht shtetasit K. P., B. V. dhe Xh. E., të tre banues në fshatin Tresh.
Gjithashtu, u ngritën pika kontrolli në akset rrugore drejt Tiranës, Shkodër dhe Kukësit.
Si rezultat i reagimit të menjëhershëm të Policisë dhe të gjendur nën presionin e kontrolleve intensive të Policisë, autorët dyshohet se e kanë zbritur nga automjeti, shtetasin D. Gj., i cili aktualisht po merr ndihmë mjeksore në spitalin e Lezhës dhe është jashtë rrezikut për jetën.
Grupi hetimor, në drejtimin e Prokurorisë, po punon për sqarimin e rrethanave dhe dokumentimin ligjor të rastit.
Ndërkohë, vijojnë kontrollet intensive për kapjen e autorëve./korrieri
