Fiks Fare vijoi vëzhgimin e katastrofave mjedisore në zonat bregdetare, ku kësaj herë pas zonës së Ishmit dhe Kepit të Rodonit, kamera e emisionit investigativ u ndal te grykëderdhja e lumit Shkumbin.
Ky lum është një nga më të ndoturit në Shqipëri.
Ai është i gjatë 181 kilometra dhe fillon në Përrenjas, në Mokër, Librazhd, Elbasan, Peqin, Rrogozhinë dhe derdhet në Detin Adriatik. Por, grykëderdhja e Shkumbinit është e mbushur plot me plehra, plastikë dhe mbetje spitalore, të cilat hidhen në rrjedhën e lumit apo përrenjtë që furnizojnë lumin. Shirat e rrëmbyeshëm më pas i çojnë deri në Detin Adriatik.
Fiksi filmoi mbetjet, ku gjendja më alarmante ishte nga pjesa e Bashkisë së Divjakës, teksa s’ishte vënë dorë prej shumë kohësh. Kishte plastikë me shumicë, por edhe mbetje spitalore të hedhura në shtratin e lumit apo përrenjve dhe më pas, ato përfundojnë në det.
Ndërkohë, qeveria ka tentuar rreth 9 vite më parë që të ndërtojë një impiant, por sërish ka dështuar, ashtu si në Lumin Ishëm. Sipas dokumenteve që ka hulumtuar Fiks Fare, në vitin 2016, Ministria e Mjedisit ka shpenzuar plot 1.1 milionë euro për atë impiant.
Gazetarët shkuan te vendi ku duhej të ishte impianti, por përveç një sheshi të shtruar me beton, dhe një kontenieri të vogël, asnjë gjë tjetër s’kishte mbetur. Pajisjet ishin marrë dhe kishin mbetur veçse pritat lumore në ferra dhe anës lumit të shkatërruara. Gjithçka ishte prishur!
Mësohet se janë bërë disa projekte dhe është tentuar të vihet në punë, por s’ka punuar asnjë ditë të vetme. Për pasojë, të gjitha plehrat që “udhëtojnë” në ujërat e lumit Shkumbin, plastika apo mbetje spitalore, shkojnë në Detin Adriatik.
Fiksi i kërkon Bashkisë së Rrogozhinës informacion për impiantin, pastrimin dhe masat që do të marrë. Mësohet se Bashkia i ka dërguar disa shkresa qeverisë për të marrë fonde shtesë për rindërtimin apo një impiant të ri, por deri tani s’ka marrë përgjigje.
Ndërkohë, Fiksi ka hulumtuar dokumente të tenderëve të vitit 2025, ku Operatori i Blerjeve të Përqendruara, ka bërë disa procedura për “pastrimin e zonave bregdetare për bashkitë Shkodër, Durrës, Kavajë, Rrogozhinë, Divjakë, Fier, Vlorë, Himarë dhe Sarandë”.
Në dokumente sqarohet se duhet të pastrohet edhe bregdeti i Bashkisë Rrogozhinë. Në fakt, bëhet një pastrim, por vetëm për zonën e Spillesë, duke lënë jashtë zonën e Vilë Bashtovës dhe grykëderdhjen e lumit Shkumbin.
Në një tabelë në shkresa është përcaktuar edhe zona e plazhit në varësi të Bashkisë së Rrogozhinës, ku do të bëhet grumbullimi dhe transporti i mbetjeve urbane, pastrimi i mbetjeve në plazhet publike dhe larje kontenierësh.
Ndërkohë, edhe në zonën e Divjakës, do të bëhen të njëjta shërbime; grumbullim dhe transport i mbetjeve urbane, pastrim i mbetjeve në plazhet publike dhe larje kontenierësh.
Në asnjë rresht, në dokumentet e këtij tenderi me vlerë 1 milionë euro, nuk parashikohet pastrimi i grykëderdhjes së lumit Shkumbin, që prek plazhet e dy bashkive; Rrogozhinë dhe Divjakë!
Fiks Fare ka mësuar se loti 1 i këtij tenderi ka qenë me objekt “shërbimi i pastrimit të zonës bregdetare për bashkinë Shkodër” me një fond 21 milionë lekë. Dhe, loti i tretë, është me objekt “shërbimi i pastrimit të zonës bregdetare për bashkitë Vlorë, Himarë dhe Sarandë” me një fond 83 milionë lekë.
Në total, shteti paguan rreth 2 milionë euro për të pastruar zonat bregdetare, por ka “harruar” çuditërisht grykëderdhjet e lumenjve, të cilat janë shndërruar në landfille të mirëfillta. /top-channel
