Në raportin më të fundit të Departamentit Amerikan të Shtetit, Shqipëria vlerësohet për hapat pozitivë në luftën kundër korrupsionit, krimit të organizuar dhe pastrimit të parave, ndërsa theksohet roli i rëndësishëm që po luan SPAK në këto përpjekje.
DASH nënvizon se, ndonëse mbeten sfida përpara, përfshirë rritjen e ndjekjeve penale dhe forcimin e bashkëpunimit ndërinstitucional, SPAK ka shënuar përparim të dukshëm, veçanërisht në rritjen e numrit dhe kompleksitetit të hetimeve për pastrim parash dhe sekuestrimeve të pasurive me burim të dyshimtë.
Sipas raportit, gjatë vitit 2023, SPAK sekuestroi pasuri me vlerë 43 milionë dollarë dhe ka vijuar aksionet edhe në vitin 2024, përfshirë arrestime dhe konfiskime të pasurive të ish-zyrtarëve të lartë.
“Shqipëria ka ndërmarrë hapa pozitivë; megjithatë, qeveria ende duhet të rrisë hetimet dhe ndjekjet penale për pastrim parash për të luftuar korrupsionin, krimin e organizuar dhe trafikun e drogës; të përmirësojë bashkëpunimin ndërinstitucional; dhe të integrojë plotësisht SPAK-un në përpjekjet kundër pastrimit të parave dhe financimit të terrorizmit (AML/CFT). SPAK ka rritur numrin dhe kompleksitetin e hetimeve dhe sekuestrimeve për pastrim parash dhe ka kryer hetime të njëkohshme financiare e pasurore kur dyshonte për pasuri të ligjshme të fituara në mënyrë të paligjshme, megjithatë, numri i ndjekjeve penale mbetet i ulët. Në vitin 2023, SPAK sekuestroi pasuri me vlerë 43 milionë dollarë dhe, në vitin 2024, vazhdoi arrestimet dhe sekuestrimin e pasurive të ish-zyrtarëve të lartë”, thuhet në raportin e DASH.
Një nga rastet më të spikatura të përmendura në raport është ai i ish-kryeministrit Sali Berisha, i cili në shtator 2024 u akuzua nga SPAK për korrupsion lidhur me veprime zyrtare që kanë favorizuar interesat e familjes së tij. Akuzat përfshijnë edhe dhëndrin e tij, ndaj të cilit rëndojnë dyshime për korrupsion dhe pastrim parash. Si pjesë e hetimeve, janë sekuestruar prona të paluajtshme, llogari bankare dhe pjesë në kompani të lidhura me aktivitetet korruptive.
“Në shtator 2024, SPAK akuzoi ish-kryeministrin dhe personin e shpallur nga Departamenti i Shtetit sipas Aktit të Miratimit të Programeve të Jashtme dhe të Ndërlidhura, 2021: 7031(c), Sali Berisha, për korrupsion në lidhje me veprime zyrtare që përfitonin interesat e familjes së tij. SPAK akuzoi gjithashtu dhëndrin e tij për korrupsion dhe pastrim parash. U sekuestruan prona të paluajtshme, llogari bankare dhe pjesa e tij në kompani të lidhura me korrupsionin”, shkruhet në raport.
Po ashtu, DASH përmend edhe operacionin e SPAK në nëntor të vitit 2024, ku në bashkëpunim me Policinë e Shtetit, Europol-in dhe autoritetet italiane, realizoi një operacion të gjerë që çoi në arrestimin e 29 personave të dyshuar si pjesë e një rrjeti të trafikut të drogës të drejtuar nga dy vëllezër shqiptarë.
Raporti i DASH e cilëson këtë qasje si një sinjal të qartë për përkushtimin në forcimin e shtetit ligjor dhe thekson rëndësinë e integrimit të plotë të SPAK në luftën kundër pastrimit të parave dhe financimit të terrorizmit.
SHIKO EDHE:
Ministrja Denaj njofton shkrirjen e AKU pas skandalit me mishin e pulës me solmonelë
Misteri i vrasjes së Ilarias, i dashuri nuk tregon motivet, çfarë fshehin prindërit
Sot temperaturat nën zero, Ministria e Mbrojtjes ka një apel
27-vjeçari u zhduk në mal në Has! Skuadrat e kërkim-shpëtimit të Kosovës ndërpresin kërkimet
Rama me Diasporën shqiptare në Milano: Qeveria italiane para 3 ditësh firmosi dokumentin e fundit për njohjen e pensioneve
Super tenderat e AKSHI-t, 4.5 mln euro në dy ditë për “ABS” , çfarë fshihet pas?
