🗣️Në një fushatë të re marketingu për hotelin e tij Green Coast, MGallery Collection, biznesmeni Samir Mane ka zgjedhur të përdorë Ermal Mamaqin. Ky i fundit, në video të shkurtra duke ironizuar bisedat e zakonshme të shqiptarëve që qajnë hallet e tyre dhe të biznesit, përpiqet që me humor të sforcuar të tallë njerëzit që i bëjnë hesapet biznesmenit të njohur.
I akomoduar në plazhin dhe hotelin ekskluziv me 5 yje të zotit Mane në Palasë, humoristi Mamaqi përpiqet të ironizojë maninë e shqiptarëve për të bërë llogari apo faqet e ndryshme online që postojnë çmimet e larta në jug. Dhe këtë në funksion të idesë për ta paraqitur biznesin ku ai po pushon – sigurisht falas – si një parajsë që ia vlen të paguhet shtrenjtë.
Në fakt, plazhe të tilla dhe hotele të shtrenjta nuk janë as shfaqje e huaj dhe as duhet të jenë objekt spekulimesh apo sulmi ndaj biznesit. Problemi i vetëm është që këto përpjekje të sforcuara, tallëse dhe banale për t’i bërë reklamë një hoteli me 5 yje tregojnë cekësinë e mendimit jo vetëm të marketingut por dhe të filozofisë së një biznesi që ka kushtuar miliona euro.
Nuk është turp të jesh i pasur dhe të ndërtosh hotel me 5 yje që nuk mund të frekuentohet nga gjithkush. Por bashkë me yjet e hotelit, ndoshta duhet të rrisësh dhe nivelin e marketingut dhe humorit që është dyleksh dhe s’ka lidhje me asnjë yll. As në qiell dhe as në tokë. /vna.al
