Duke filluar nga sot do të bllokohet qarkullimi i automjeteve në aksin rrugor Vorë-Ura e Dajlanit, për shkak se Autoriteti Rrugor Shqiptar do të nisë një ndërhyrje për riparimin e shtresave asfaltike.
Sipas një njoftimi të bërë për qytetarët nga ARRSH, do të ketë bllokim të qarkullimit në drejtimin Vorë-Durrës, përkatësisht në këto segmente:
• Vorë-Maminas,
• Maminas-Sukth,
• Sukth-Fllakë,
• Fllakë-Mbikalimi i Shkozetit,
• Mbikalimi i Shkozetit-Ura e Dajlanit.
Sipas njoftimit, për çdo segment të mësipërm, punimet do të zgjasin nga 1 deri në 2 ditë. ARRSH u sugjeron drejtuesve të automjeteve që të përdorin rrugën alternative: Vorë-Maminas-Katër rrugët e Shijakut-Durrës.
ARRSH raporton se pas përfundimit të punimeve në krahun Vorë-Durrës, do të vijojë puna edhe në krahun tjetër Ura e Dajlanit-Vorë, sipas të njëjtave segmente dhe kohëzgjatje, çka nënkupton se ky aks rrugor do të qëndrojë i bllokuar për disa ditë.
