Një operacion i befasishëm i zhvilluar këtë të hënë nga Policia e Shtetit në Elbasan ka çuar në ndalimin e disa personave, mes të cilëve edhe biznesmeni Bujar Muça, pronar i kompanisë së njohur “Delta Group” dhe ish-deputet i PDIU-së.
Operacioni është zhvilluar rreth orës 15:30, në një lokal përgjatë aksit Elbasan – Ish-Metalurgjia, në zonën e fshatit Katund i Ri. Forcat e policisë ndërhynë pas një sinjalizimi për praninë e disa personave të dyshuar, duke arrestuar të paktën 11 shtetas, ndërsa gjatë kontrollit janë sekuestruar tre armë zjarri tip pistoletë, të gatshme për përdorim.
Burime policore konfirmojnë se tre prej të ndaluarve kanë refuzuar të deklarojnë identitetin, ndërsa dyshohet se kanë paraqitur dokumente të falsifikuara. Përveç Muçës, mes personave të ndaluar rezultojnë dhe dy persona të tjerë, të dyshuar për precedentë të rëndë kriminalë.
Kush është Bujar Muça
Bujar Muça është sipërmarrës elbasanas dhe themelues i kompanisë “Delta Group”, një prej emrave të njohur në sektorin e ndërtimit dhe tregtisë.
Në zgjedhjet parlamentare të vitit 2017, ai u përfshi në politikë nën siglën e Partisë për Drejtësi, Integrim dhe Unitet (PDIU), duke fituar mandatin e deputetit, në një periudhë kur kjo forcë politike shënoi një rritje të ndjeshme me rreth 27 mijë vota në rang kombëtar.
Megjithatë, Muça e mbajti mandatin vetëm për dy muaj, duke dhënë dorëheqjen dhe duke u tërhequr përfundimisht nga jeta politike. Prej asaj kohe, ai është përqendruar në aktivitetet e tij private dhe nuk ka pasur më angazhime publike.
Aksioni dhe hetimet
Sipas burimeve nga Prokuroria e Elbasanit, operacioni është zhvilluar në kuadër të një hetimi për veprimtari të dyshuar kriminale, ndërsa autoritetet po verifikojnë të dhënat filmike të kamerave të sigurisë për të identifikuar lëvizjet dhe kontaktet e personave të arrestuar.
Në momentin e ndërhyrjes, në lokalin ku ndodheshin personat e dyshuar ishin të pranishëm dhjetëra klientë, dhe sipas dëshmive, ka pasur kundërshtime fizike dhe përplasje me efektivët.
Policia e Elbasanit po vijon me kontrollet në banesat dhe bizneset e të ndaluarve, ndërsa pritet që brenda orëve në vijim Prokuroria të japë njoftimin zyrtar për akuzat konkrete ndaj tyre.
Arrestimi i Bujar Muçës, një emër i njohur si në biznes ashtu edhe për shkak të shkurtër angazhimit të tij politik, ka ngjallur interes të madh publik, ndërsa hetimet pritet të zbulojnë nëse ai ka pasur ndonjë lidhje direkte me veprimtarinë për të cilën është shënjestruar operacioni policor.
