Boja rrëfeu se në vitin 2019 ishte përfshirë në negociata mes familjes Rraja dhe familjes Maloku, pas kërkesës së Asllan Rrajës, i cili e kishte thirrur për të ndërmjetësuar në emër të djalit të tij, Redian Rraja.
Sipas dëshmisë së tij, gjatë takimeve me familjarë të Rrajës, këta të fundit kanë mohuar çdo përfshirje në ngjarjen e vrasjes së Andi Malokut dhe kanë bërë betim në Kuran për këtë. “I kam pyetur nëse kanë lidhje me ngjarjen dhe ata kanë bërë be në Kuran që nuk kanë asnjë dijeni për vrasjen,” – deklaroi Boja në sallën e gjyqit.
Ai tregoi se pas kontaktit me familjen Rraja, kishte zhvilluar takim me Genc Malokun, babain e Andit, i cili i kishte dhënë një afat tre mujor, sipas “rregullit shqiptar”, për të parë zhvillimet dhe për të vendosur më pas lidhur me hakmarrjen.
“Genci Maloku na tha që djali i tij ishte vrarë i pafajshëm në rrugë dhe kërkoi të priste për drejtësinë. Ne i kërkuam të mos ndërmerrte asnjë veprim hakmarrjeje dhe të priste rezultatin e hetimeve. Ai nuk pranoi ta zgjaste më tej afatin dhe më pas nuk jemi takuar më,” – pohoi Boja.
Në fund të dëshmisë, ai sqaroi se nuk i njeh personalisht të pandehurit në sallë, ndërsa theksoi se familja Rraja kërkonte pajtim, ndërsa familja Maloku kishte dhënë garanci se për tre muaj nuk do të ndërmerrte asnjë veprim hakmarrës.
