Policia e Tiranës ka dhënë informacion lidhur me atentatin e ndodhur sot në rrethrrotullimin e Rinasit, ku mbeti i vrarë Gilmando Dani dhe u plagos pasagjeri që ndodhej në makinë me të.
Policia thotë se i plagosur ka mbetur shtetasi M.Sh, rreth 40-vjeç, i cili ndodhet në gjendje të rëndë për jetën në spital.
“Rreth orës 14:20, te rrethrrotullimi në afërsi të aeroportit, dyshohet se është qëlluar me armë zjarri drejt automjetit me të cilin po lëviznin shtetasit M. Sh., rreth 40 vjeç dhe G. D., rreth 47 vjeç.
Si pasojë ka humbur jetën shtetasi G. D. dhe është plagosur shtetasi M. Sh., i cili ndodhet në spital, në kujdesin e mjekëve, në gjendje të rëndë shëndetsore.
Shërbimet e Policisë kanë rrethuar zonën, kanë ngritur pika kontrolli dhe vijojnë punën për kapjen e autorit/ëve.
Ndërkohë, grupi hetimor, në drejtimin e Prokurorisë, po punon për zbardhjen e rrethanave të ngjarjes”, njofton policia.
Makina e autorëve, sipas dëshmitarëve ka qenë me targa greke dhe është larguar në drejtim të Fushë-Krujës. Drejt makinës së Danit është qëlluar me breshëri kallashnikovi.
