Sipas të dhënave të përditësuara nga Instituti i Gjeoshkencave IGJEO dhe Shërbimi Meteorologjik Ushtarak SHMU, vendi do të përfshihet nga reshje me intensitet të lartë gjatë gjithë javës. Reshjet do të shoqërohen me shtrëngata dhe në zonat mbi 400 metra lartësi me dëborë dhe ngrica, duke rritur rrezikun në qarkullimin rrugor dhe përmbytje.
Ditën e Hënë 17 Nëntor 2025, reshje mesatare deri lokalisht intensive do të prekin qarqet Shkodër, Lezhë dhe Vlorë. Në Kukës, Dibër, Durrës, Tiranë dhe Gjirokastër reshjet do të jenë të dobëta deri mesatare, të shoqëruara me shtrëngata. Intensiteti pritet të rritet gjatë pasdites.
Ditën e Martë 18 Nëntor reshjet shtohen në të gjithë territorin. Qarqet Shkodër, Kukës, Vlorë dhe Gjirokastër do të përfshihen nga reshje intensive deri shumë intensive. Në Lezhë priten reshje intensive. Dibra, Durrësi dhe Tirana do të kenë reshje mesatare deri intensive. Shtrëngatat do të jenë të pranishme në të gjithë vendin.
Ditën e Mërkurë 19 Nëntor pritet kulmi i motit të keq me reshje të dendura. Shkodër, Kukës, Vlorë dhe Gjirokastër do të kenë reshje intensive deri shumë intensive. Në qarqet e tjerë intensiteti do të jetë mesatar deri i lartë.
Ditën e Enjte 20 Nëntor pritet ulje graduale e intensitetit të reshjeve. Shkodër, Vlorë dhe Gjirokastër do të kenë reshje të dobëta deri mesatare, ndërsa në qarqet e tjera reshjet do të jenë të dobëta.
Reshjet në formë dëbore parashikohen në zonat malore në Veri, Lindje dhe Juglindje, duke sjellë mundësinë e ngricave dhe vështirësi në qarkullimin rrugor.
Sipas parashikimeve hidrometeorologjike, në basenin e Drinit reshjet pritet të arrijnë:
Fierzë 150 deri 200 milimetra
Koman dhe Vau i Dejës deri në 300 milimetra
Ministria e Mbrojtjes, përmes Agjencisë Kombëtare të Mbrojtjes Civile, ka urdhëruar të gjitha strukturat vendore dhe qendrore të marrin masa për parandalimin e përmbytjeve, të jenë në gatishmëri të menjëhershme dhe të sigurojnë koordinim ndërinstitucional për menaxhimin e emergjencave.
Agjencia Kombëtare e Mbrojtjes Civile ka kërkuar rritjen e gatishmërisë së bashkive në nivel maksimal. Strukturat e emergjencave civile do të informojnë publikun për çdo zhvillim të ri.
Qytetarët në zonat e prekura ftohen të tregojnë kujdes të shtuar gjatë kësaj periudhe.
