Qeveria ka vendosur të shpërblejë edhe këtë fundvit pensionistët dhe përfituesit e kategorive të veçanta, duke ndarë një fond total prej 10.4 miliardë lekësh. Vendimi i Këshillit të Ministrave parashikon bonuse nga 10 mijë deri në 15 mijë lekë, varësisht llojit dhe masës së pensionit.
Sipas VKM-së, pensionistët që marrin pension deri në 20 mijë lekë do të përfitojnë 15 mijë lekë, ndërsa ata me pension mbi këtë shumë do të marrin 10 mijë lekë. Përfitues të shumës 15 mijë lekë janë edhe disa kategori të tjera sociale, si përfitues të trajtimeve të veçanta, pensioneve të invaliditetit, familjarëve dhe pensioneve sociale.
Në kategorinë e përfituesve të shpërblimit hyjnë:
• Pensionistët me pension pleqërie deri në 20 mijë lekë
• Përfitues të pensioneve të invaliditetit, familjarëve dhe pensionit social
• Fëmijët në përkujdesje të Republikës
• Përfitues të trajtimeve të veçanta financiare
• Veteranë të LANÇ-it dhe persona me pensione të posaçme
• Punonjës që kanë përfituar pension të parakohshëm për shkak të shërbimit
• Ish-punonjës të minierave, industrisë së naftës, gazit dhe metalurgjisë
Ndërsa shpërblimin prej 10 mijë lekësh do ta marrin:
• Pensionistët me pension pleqërie mbi 20 mijë lekë
• Përfitues të trajtimeve të veçanta me masë mbi 20 mijë lekë
• Persona me pensione suplementare apo pensione të posaçme shtetërore
Sipas vendimit, të gjithë personat që përfitojnë pension deri më 31 dhjetor 2025 do ta marrin shpërblimin vetëm një herë, pavarësisht nëse janë pjesë e më shumë se një skeme.
Pagesat do të kryhen gjatë muajit dhjetor 2025. Në rast se ndonjë pagesë nuk realizohet brenda muajit, ajo do të jepet deri më 30 qershor 2026. Çdo shpërblim i patërhequr pas kësaj date konsiderohet i parashkruar.
Fondi prej 10.4 miliardë lekësh do të përballohet kryesisht nga buxheti i parashikuar për bonusin e pensionistëve, ndërsa pjesa tjetër nga buxheti i sigurimeve shoqërore.
Instituti i Sigurimeve Shoqërore, Posta Shqiptare dhe bankat e nivelit të dytë do të administrojnë pagesat sipas procedurave të zakonshme.
Ky shpërblim vjen si mbështetje për pensionistët në prag të festave të fundvitit dhe në kushtet e rritjes së kostove të jetesës. /korrieri
