Një plan i klasifikuar amerikan i vitit 1930, i njohur si War Plan Red, parashikonte një pushtim të Kanadasë me përdorimin e armëve kimike, shkatërrimin e infrastrukturës dhe kontrollin e qyteteve kryesore për të neutralizuar çdo rezistencë civile. Sipas autorëve të planit, sulmi do të ishte i shpejtë dhe Kanadaja do të binte brenda disa ditësh.
Ky plan u hartua si pjesë e një strategjie kundër Britanisë së Madhe, ku Kanadaja do të shërbente si teatër i mundshëm lufte. Por tani, frika historike ka marrë përmasa të reja me politikat e jashtme agresive të SHBA-ve dhe veprimet e presidentit Donald Trump, shkruan The Guardian.
Në janar, Trump dhe zyrtarë të tjerë amerikanë diskutuan hapur përdorimin e forcës për të pushtuar Groenlandën për pozicionin strategjik dhe pasuritë minerale, duke ringjallur shqetësimet e fqinjëve të veriut. Ai gjithashtu i quajti kufijtë mes SHBA-ve dhe Kanadasë një “linjë artificiale” dhe sugjeroi se kontinentin mund ta bashkonte me forcë.
Trump postoi gjithashtu një imazh në rrjetet sociale ku flamuri amerikan mbulonte Kanadanë, Groenlandën dhe Venezuelën, një veprim që u kritikua fuqishëm nga ligjvënës kanadezë. Ekspertët thonë se këto deklarata nxjerrin në pah ankthin e vazhdueshëm të Kanadasë për vulnerabilitetin ndaj agresionit amerikan.
Thomas Homer-Dixon, studiues në institutin kanadez Cascade Institute, thotë se ndjekja e Groenlandës tregon “lakmi të hapur dhe pasuri” nga Shtëpia e Bardhë dhe nuk ka asnjë justifikim real sigurie. Ai paralajmëron se Trump mund të përdorë propagandë për të demonizuar Kanadanë, duke përmendur kufirin e gjatë dhe trafikimin e drogës, për të justifikuar ndërhyrje të mundshme.
Kanadaja po merr masa për të forcuar mbrojtjen e saj. Një sondazh i vitit 2025 tregoi se 43% e kanadezëve e shihnin një sulm ushtarak amerikan brenda pesë viteve si të mundshëm. Ushtria kanadeze ka planifikuar trajnime për punonjës federalë dhe provincialë në përdorimin e armëve, drejtimin e automjeteve dhe pilotimin e dronëve për të rritur rezervat kombëtare. Aktualisht, rezervat përbëhen nga 4 mijë e 384 persona, por planet e reja synojnë rritjen e tyre deri në 300 mijë.
Homer-Dixon thekson rëndësinë e forcimit të marrëdhënieve me aleatët skandinavë dhe adoptimin e parimit të tyre.
“Nëse na sulmoni, mund të keni sukses, por do të vuani pasoja të mëdha”. Ai shton se ideja se “fuqia është e drejtë” ka qenë gjithmonë pjesë e kulturës amerikane dhe nuk ka zhdukur kurrë, duke ringjallur frikën historike të Kanadasë.
