Familjarët e Artur Çangut, i cili u qëllua për vdekje me çifte pasditen e së premtes në fshatin Vrion në Nikël, kanë mohuar para policisë të kenë konflikte me autorin e dyshuar Eduart Afmataj apo familjarë të tij.
Mbrëmjen e kaluar familjarë të viktimës dhe të autorit të dyshuar janë shoqëruar dhe kanë dhënë shpjegimet e tyre para hetuesve.
Djemtë e viktimës kanë deklaruar se babai i tyre kishte dalë nga shtëpia për të shkuar tek një ullishte në pronësi të tyre, por nuk dinë se çfarë ndodhi më tej.
Nisur nga fakti se ngjarja nuk ka pasur dëshmitarë okularë, policia ende nuk ka një pistë të qartë se përse ka ndodhur ngjarja.
Pas vrasjes, Eduart Afmataj ka telefonuar vetë policinë duke deklaruar se Artur Çangu është qëlluar për vdekje, por më pas është larguar nga vendngjarja. Deri më tani ai nuk është arrestuar nga policia.
