Shtetet e Bashkuara po shqyrtojnë mundësinë e vendosjes së raketës hipersonike hipersonike, të njohur si “Dark Eagle” (Shqiponja e Errët), në Lindjen e Mesme, në një periudhë tensionesh të larta me Iranin dhe pasigurie për vazhdimësinë e armëpushimit.
Sipas raportimeve të Bloomberg, kërkesa për dislokimin e këtij sistemi ka ardhur nga Komanda Qendrore e Forcave të Armatosura të SHBA-së.
Arsyeja kryesore lidhet me vlerësimet se Irani ka zhvendosur disa nga lëshuesit e raketave balistike jashtë rrezes së armëve aktuale amerikane, siç është Precision Strike Missile, që mund të godasë objektiva mbi 482 kilometra larg.
Nëse ky plan miratohet, do të ishte hera e parë që arma hipersonike “Dark Eagle” përdoret në mënyrë operacionale. Sistemi, i njohur edhe si Long-Range Hypersonic Weapon (LRHW), ka një rreze veprimi të vlerësuar rreth 2,776 kilometra dhe është projektuar për të shkatërruar objektiva strategjikë dhe instalime të fortifikuara.
Kostoja e një rakete të vetme arrin rreth 15 milionë dollarë, ndërsa numri i tyre është i kufizuar, me vlerësime që flasin për më pak se tetë njësi në dispozicion. Ndërkohë, një sistem i plotë lëshimi mund të kushtojë rreth 2.7 miliardë dollarë.
Këto zhvillime ndodhin në një moment delikat, pasi një armëpushim i brishtë mes SHBA-së dhe Iranit është në fuqi që nga fillimi i prillit. Megjithatë, tensionet mbeten të larta dhe negociatat për një marrëveshje paqeje nuk kanë dhënë rezultat.
Presidenti amerikan Donald Trump ka lënë të hapur mundësinë e rifillimit të veprimeve ushtarake. Së fundmi, ai mbrojti bllokadën ndaj eksporteve iraniane të naftës, e cila ka hyrë në ditën e saj të 16-të, duke e cilësuar atë si shumë efektive.
Ai gjithashtu hodhi poshtë një propozim nga Teherani për rihapjen e Ngushticës së Hormuzit për transportin ndërkombëtar, në këmbim të shtyrjes së bisedimeve për programin bërthamor.
Deri tani nuk ka konfirmim zyrtar për vendosjen e sistemit “Dark Eagle”, ndërsa vende si Rusia dhe Kina kanë zhvilluar tashmë armë të ngjashme hipersonike, duke rritur më tej garën ushtarake globale.
