I fshehur prej vitesh pas pyjeve të Dajtit dhe kujtimeve të një kohe tjetër, ish-Kampi i Pionierëve po përgatitet të transformohet në një resort privat me hotel dhe vila, pas një historie të gjatë transferimesh, shitjesh aksionesh dhe vendimesh që sot ngrenë pikëpyetje të forta mbi mënyrën sesi një pronë shtetërore përfundoi në duar private.
Kompleksi, i konsideruar dikur si një nga asetet më prestigjioze rekreative të Tiranës para viteve ’90, shërbente si kamp pushimi dhe hotel për pionierët, me godina akomoduese, ambiente shërbimi dhe një shesh të madh në zemër të Malit të Dajtit. Pas ndryshimit të sistemit, prona kaloi nën administrimin e Bashkimit të Sindikatave të Pavarura të Shqipërisë, organizatë që përfitoi qindra prona publike në të gjithë vendin.
Me kalimin e viteve, një pjesë e konsiderueshme e këtyre pronave u shitën ose u transferuan, ndërsa i njëjti fat ndoqi edhe Kampin e Pionierëve. Fillimisht prona iu dha me qira një shtetasi të huaj, më pas aksionet ndryshuan disa herë pronar, deri sa kontrolli i plotë kaloi te familja Malo, e cila zotëron sot kompaninë “Dajtel” dhe operatorin e teleferikut “Dajti Ekspres”.
Në prill të vitit 2026, Këshilli Kombëtar i Territorit dhe Ujit shqyrtoi rishikimin e lejes së ndërtimit për projektin që parashikon rikonstruksionin e ish-Kampit dhe ndërtimin e një kompleksi të ri hotelerie e vilash në zonë.
Sipas dokumenteve të projektit, zona e zhvillimit përfshin rreth 80 mijë metra katrorë tokë, ku përfshihen godina ekzistuese e Kampit të Pionierëve, fusha përballë teleferikut dhe disa objekte të tjera ndihmëse. Projekti synon rikthimin e godinës kryesore në funksion hotelerie me standard 4 ose 5 yje, ndërsa përreth saj do të ndërtohen 12 vila druri të stilit skandinav.
Në dokumentet e masterplanit thuhet se ndërhyrja synon “rijetëzimin” e zonës dhe minimizimin e ndikimit në natyrë, ndërsa aktiviteti do të fokusohet te turizmi malor dhe rekreacioni.
“Propozimi synon përmirësimin e gjendjes së degraduar të zonës dhe shtimin e sipërfaqeve të gjelbëruara”, thuhet në relacionin teknik.
Por përtej projektit arkitektonik, dokumentet hedhin dritë edhe mbi mënyrën sesi prona u transferua gradualisht në sektorin privat.
Në vitin 2019, BSPSH shiti 2% të aksioneve të kompanisë për vetëm 10 mijë euro, ndërsa në vitin 2025 u shitën edhe 8% të tjera për rreth 42 mijë euro. Transaksionet konsiderohen të papërfillshme krahasuar me vlerën reale të një prone prej 8 hektarësh në zonën turistike të Dajtit.
Përmes këtyre lëvizjeve, familja Malo mori kontrollin e plotë të kompanisë dhe të pronës, duke u bërë përfituesja finale e një prej aseteve më të njohura shtetërore të periudhës para viteve ’90.
Dokumentet tregojnë gjithashtu se projekti i ri nuk kufizohet vetëm te restaurimi i godinës ekzistuese. Zona është konceptuar si një kompleks i integruar hotelerie, rekreacioni dhe rezidencash turistike, me ndarje funksionale mes pjesës së hotelit dhe zonës sportive e rekreative.
Në qendër të projektit do të krijohet një shesh kryesor që do të shërbejë si nyje lidhëse mes zonave të kompleksit, ndërsa vilat do të ndërtohen në pika të larta të terrenit për të siguruar pamje panoramike dhe ndriçim natyral.
Historia e Kampit të Pionierëve rikthen edhe një herë në vëmendje debatin mbi mënyrën sesi prona publike kaloi nga shteti te Sindikatat dhe më pas në sektorin privat, përmes shitjeve të njëpasnjëshme dhe vlerave minimale, ndërsa institucionet ligjzbatuese nuk kanë hapur ende një hetim të plotë mbi procesin e tjetërsimit të saj./korrieri
