Një grua e dyshuar për sulmin me bombë të ndodhur javën e kaluar në Monako, ku mbeti i plagosur rëndë një biznesmen me origjinë ukrainase, është gjetur e vrarë me armë zjarri pranë Kievit. Zhvillimi përbën kthesën më të fundit në një çështje që ka tronditur principatën mesdhetare.
Prokuroria e Ukrainës njoftoi të martën se gruaja ishte gjetur me një plagë plumbi në kokë. Në lidhje me çështjen janë arrestuar edhe dy burra, mes tyre një oficer i shërbimit të inteligjencës ushtarake ukrainase (HUR) dhe një ish-efektiv i forcave të rendit.
Të premten, Interpol lëshoi një njoftim të kuq për 39-vjeçaren Anastasiia Berezovska, shtetase ukrainase që flet gjermanisht. Ajo kërkohej nga autoritetet e Monakos nën akuzat për tentativë vrasjeje, vendosje të një mjeti shpërthyes në një vend publik me qëllim kriminal dhe bashkëpunim në një organizatë kriminale.
Sipas prokurorëve ukrainas, Berezovska kishte marrë pagesa në kriptomonedha nga dy personat e arrestuar, çka i ka shtyrë hetuesit t’i konsiderojnë ata si persona të dyshuar për përfshirje në atentatin e ndodhur në Monako. Prokuroria shtoi se oficeri i HUR-it kishte vepruar me iniciativën e tij dhe nuk kishte njoftuar eprorët për kontaktet me Berezovskën.
Autoritetet publikuan gjithashtu pamje nga ajo që e përshkruan si një “dhomë torture”, ku u gjetën çekiçë dhe pajisje të tjera gjatë kontrolleve në pronat e të arrestuarve. The Guardian thekson se nuk ka mundur të verifikojë në mënyrë të pavarur pretendimet e prokurorisë ukrainase.
Çështja mund të ketë pasoja politike për Kievin. Çdo provë që do të lidhte pjesëtarë të shërbimeve sekrete ukrainase me një sulm me bombë në territorin evropian do të ishte shumë e dëmshme, në një kohë kur presidenti Volodymyr Zelenskyy ndodhej në samitin e NATO-s duke kërkuar mbështetje të mëtejshme nga aleatët perëndimorë, ndërsa Rusia vazhdon sulmet ndaj qyteteve ukrainase.
Princi Albert II i Monakos e kishte dënuar më herët sulmin, duke e cilësuar si “një akt të neveritshëm”, ndërsa bëri të ditur se të gjitha shërbimet e sigurisë së principatës ishin angazhuar në hetim.
Edhe pse autoritetet nuk i kanë identifikuar zyrtarisht viktimat, burime policore dhe gjyqësore i thanë mediave franceze se bëhej fjalë për biznesmenin 58-vjeçar Vadym Iermolaiev, me origjinë nga Ukraina dhe shtetësi qipriote, partneren e tij dhe djalin e tyre. Iermolaiev dhe partnerja pësuan plagë të rënda, ndërsa fëmija u lëndua lehtë.
Sipas prokurorëve francezë, Berezovska, e cila jetonte në Gjermani, ishte maskuar si burrë përpara se të vendoste mjetin shpërthyes në hyrjen e pallatit ku banonte familja në Monako.
Që nga fillimi i pushtimit të plotë rus të Ukrainës, Iermolaiev jetonte në Monako, pjesë e një grupi biznesmenësh dhe politikanësh të pasur ukrainas, të cilët mediat e pavarura ukrainase i kanë quajtur “Batalioni i Monakos”.
Në vitin 2023, Ukraina vendosi sanksione ndaj Iermolaievit, duke pretenduar se ai kishte ruajtur lidhje biznesi me subjekte ruse që vepronin në territoret ukrainase të pushtuara nga Moska, përfshirë Krimenë, të cilën Rusia e aneksoi në mënyrë të paligjshme në vitin 2014.
Zëvendësprokurori i Monakos deklaroi javën e kaluar se e dyshuara ishte larguar nga principata në këmbë drejt Francës dhe më pas kishte udhëtuar me makinë drejt Gjermanisë, duke kaluar nëpër disa vende evropiane, përfshirë Italinë.
Ukraina ka kryer më parë operacione të shumta vdekjeprurëse me mjete shpërthyese kundër zyrtarëve të lartë ushtarakë rusë dhe bashkëpunëtorëve të Kremlinit brenda territorit rus, por deri më tani nuk ekziston një precedent i njohur për sulme të tilla në territorin e vendeve evropiane.
Javën e kaluar, prokurorët gjermanë akuzuan “autoritete shtetërore ukrainase” se kishin urdhëruar sulmin me eksploziv ndaj gazsjellësve Nord Stream në vitin 2022.
