PS depoziton e vetme hartën e re të territorit. Ajo është depozituar sot në Kuvend nga deputetët e mazhorancës, anëtarë të Komisionit të Posaçëm Parlamentar për Reformën Administrativo-Territoriale, dhe i është përcjellë gjithashtu drejtuesve të bashkive e këshillave bashkiakë në të gjithë vendin.
Sipas projektit të ri, bashkia mbetet e vetmja njësi e vetëqeverisjes vendore, duke ruajtur strukturën me një kryetar, një këshill, një administratë dhe një buxhet të vetëm. Risia kryesore që i përgjigjet shqetësimeve të ngritura në dëgjesa publike dhe gjetjeve të raportit të ekspertëve është futja e një niveli të ri të brendshëm organizativ: “Qyteti”.
Përmes kësaj ndërhyrjeje, modeli i deritanishëm “Bashki – Njësi Administrative” transformohet në “Bashki – Qytet – Njësi Administrative”. Qyteti do të ketë një rol më të qartë në planifikim, përfaqësim dhe koordinim shërbimesh, i drejtuar nga një nënkryetar bashkie i ngarkuar posaçërisht me mbarëvajtjen administrative.
Nga 61 në 46 Bashki: Si ndryshon harta vendore
Nga konsolidimi i 28 bashkive ekzistuese në 13 të reja, numri i përgjithshëm i bashkive në Shqipëri ulet nga 61 në 46. Harta e re do të përbëhet nga 46 bashki, 71 qytete përbërëse dhe 387 njësi administrative (ku 20 bashki do të përfshijnë më shumë se një qytet). Ndërkohë, 12 qarqet e vendit mbeten pa ndryshim.
Tabela e bashkimeve territoriale:
Berati: Përpin bashkitë Dimal dhe Poliçan.
Mati: Përpin bashkinë Klos.
Elbasani: Përpin bashkitë Cërrik dhe Belsh.
Librazhdi: Përpin bashkinë Prrenjas.
Fieri: Përpin bashkinë Patos.
Lushnja: Përpin bashkinë Divjakë.
Gjirokastra: Përpin bashkinë Libohovë.
Tepelena: Përpin bashkinë Memaliaj.
Përmeti: Përpin bashkinë Këlcyrë.
Korça: Përpin bashkinë Maliq.
Vlora: Përpin bashkinë Selenicë.
Puka: Përpin bashkinë Fushë Arrëz.
Tirana: Merr në territorin e saj Rinasin, ndërsa bashkia e Vorës mbetet më vete.
