Biznesmeni Rrok Gjoka është paraqitur këtë të mërkurë në ambientet e Prokurorisë së Posaçme, ku ka qëndruar për rreth tre orë.
Pas përfundimit të paraqitjes, ai është larguar nga godina e SPAK-ut pa dhënë asnjë deklaratë për gazetarët.
Deri tani nuk ka një njoftim zyrtar nga Prokuroria e Posaçme lidhur me arsyen e thirrjes apo statusin me të cilin Gjoka është paraqitur.
Emri i biznesmenit lidhet edhe me procedurën e prokurimit për ndërtimin e tunelit të Llogarasë, një nga tenderët më të debatueshëm të viteve të fundit.
Për këtë çështje është marrë e pandehur ish-ministrja e Infrastrukturës dhe Energjisë, Belinda Balluku.
Kompania “Gjoka” sh.p.k. ishte shpallur fillimisht fituese e procedurës së parë, por tenderi u anulua.
Në komunikimet e administruara në dosjen hetimore mes Ballukut dhe ish-drejtorit të ARRSH-së, Evis Berberi, ish-ministrja shprehej se kishte një ndjesi jo të mirë për procedurën.
Pas anulimit, kontrata iu dha një konsorciumi turk, oferta e të cilit ishte rreth 50 milionë euro më e lartë se oferta e kompanisë shqiptare.
Megjithëse nuk mori kontratën kryesore, kompania e Rrok Gjokës u përfshi më pas në realizimin e një pjese të konsiderueshme të punimeve, në rolin e nënkontraktorit.
SPAK po heton procedurën e tenderimit të tunelit të Llogarasë, ndërsa në dosje janë ngritur dyshime për manipulimin e garës në favor të konsorciumit turk.
Megjithatë, mbetet e pakonfirmuar nëse qëndrimi treorësh i Rrok Gjokës në SPAK lidhet me këtë hetim apo me një çështje tjetër.
Prokuroria e Posaçme nuk ka dhënë ende hollësi mbi paraqitjen e biznesmenit.
