Presidenti amerikan Donald Trump ka deklaruar se të gjitha minat që ndodheshin në ujërat ndërkombëtare të Ngushticës së Hormuzit janë larguar ose shkatërruar.
Përmes një postimi në Truth Social, Trump tha se ishte informuar nga Marina amerikane se operacioni për pastrimin e minave kishte përfunduar.
“Jam informuar nga Marina e Shteteve të Bashkuara se të gjitha minat janë larguar dhe/ose janë shpërthyer në ujërat ndërkombëtare të Ngushticës së Hormuzit”, shkroi presidenti amerikan.
Trump paralajmëroi gjithashtu Iranin se çdo anije apo mjet lundrues që do të tentojë të vendosë mina të reja në zonë do të shkatërrohet menjëherë dhe në mënyrë sistematike.
Presidenti amerikan pretendoi se SHBA-ja po monitoron çdo pjesë të Ngushticës së Hormuzit përmes Forcës Hapësinore amerikane, ndërsa theksoi se ndaj vendosjes së minave është vendosur një politikë e “tolerancës zero”.
Ngushtica e Hormuzit është një nga korridoret detare më strategjike në botë për transportin e naftës dhe gazit. Çdo pengesë apo kërcënim ndaj lundrimit në këtë zonë mund të shkaktojë pasoja të rëndësishme për furnizimin dhe çmimet globale të energjisë.
