Lulzim Basha është zhdukur thuajse plotësisht nga skena politike pas zgjedhjeve, ku nuk arriti të siguronte mandatin e deputetit, ndërsa fushata e tij u identifikua më shumë me shprehjen “O Ramë, ku i ke shokët?” sesa me rezultatin elektoral.
Por ndërsa Basha ka humbur gjurmët, një prej emrave të lidhur me historinë e familjes së tij rikthehet përmes një lejeje ndërtimi të miratuar nga qeveria e Edi Ramës.
Këshilli Kombëtar i Territorit dhe Ujit ka miratuar ndërtimin e një godine banimi dhe shërbimi me 11 dhe 12 kate, si dhe dy kate parkim nëntokësor, në Tiranë. Leja mban firmën e kryeministrit Edi Rama.
Zhvillues i projektit është shoqëria “Triangolo”, mes aksionerëve të së cilës rezulton ndërtuesi Xhuvi Sharxhi. Ky i fundit ishte ortak me Xhafer Isufin, vjehrrin e Lulzim Bashës, në ndërtimin e kompleksit “Jon” në zonën e Ujit të Ftohtë në Vlorë.
Kompleksi “Jon” u shemb me urdhër të qeverisë Rama pak pasi socialistët morën pushtetin, me argumentin se ndërtesa cenonte vijën bregdetare. Objekti kishte leje ndërtimi dhe apartamentet ishin hipotekuar.
Pronarët iu drejtuan më pas Gjykatës Europiane për të Drejtat e Njeriut dhe siguruan dëmshpërblime prej miliona eurosh nga buxheti i shtetit shqiptar.
Tashmë, më shumë se një dekadë pas shembjes në Vlorë, emri i Xhuvi Sharxhit shfaqet në një projekt të ri ndërtimi të miratuar nga vetë qeveria Rama.
Pallati do të ndërtohet në pjesën perëndimore të Tiranës, rreth 2.1 kilometra larg Sheshit “Skënderbej”, mbi një sipërfaqe trualli prej 1,101 metrash katrorë.
Sipas dokumentacionit të projektit, ndërtesa do të përbëhet nga dy volume të ndërthurura, ndërsa parashikohen edhe hapësira publike dhe sipërfaqe të gjelbëruara. Ironikisht, leja vjen pikërisht nga qeveria e Edi Ramës, të cilit Basha i kërkonte shokët gjatë gjithë fushatës. /korrieri
