Një kthesë e frikshme del në dritë në rastin e zhdukjes së gruas 50-vjeçare kineze, Yu Ting, e cila u zhduk në mënyrë misterioze katër muaj më parë në Artemis. Pasaporta e saj u gjet e prerë në 22 shirita në Attiko Alsos, një zbulim tronditës që e ndërlikon më tej ngjarjen triller.
Pasaporta, një dokument bazë identifikimi, u gjet e hedhur të dielën e kaluar, e djegur nga dielli, gjë që sugjeron se kishte mbetur në vendngjarje për javë të tëra. Burri i gruas së zhdukur, në deklaratat e tij, shprehu habinë e tij:
“Disa njerëz që po shëtisnin qenin e tyre në korije panë copat e pasaportës dhe njoftuan autoritetet. Pse do ta copëtonin dhe do ta hidhnin atje, në vend që ta digjnin plotësisht?”
Kjo pyetje qëndron si një dritë në errësirë. Kush donte ta shkatërronte pasaportën e saj dhe, më e rëndësishmja, pse zgjodhën këtë mënyrë të pazakontë?
Telefoni celular i Yu Ting ishte gjetur në një vend tjetër, në Sheshin “Amerika”, rreth 2.5 kilometra larg.
“Vendndodhja në Sheshin “Amerika” përkon më shumë me planin e saj për atë ditë. Ajo duhej të shkonte në atë takim”, theksoi burri i saj, duke përforcuar skenarët e çorientimit të autoriteteve.
Anastasios Dougas, avokati i bashkëshortit, theksoi një pikë tjetër thelbësore: Bashkia e kishte pastruar barin e thatë në zonë para 15 gushtit. Prandaj, koha e saktë kur u hodh dokumenti merr një rëndësi të madhe. Laboratorët mjeko-ligjorë pritet të japin përgjigje për prova të mundshme të ADN-së, ndërsa përdorimi i një makine për copëtimin e dokumenteve, siç vlerëson bashkëshorti, çon në mendime për përfshirje profesionale.
Dhe zhvillimet nuk ndalen. Gjetje të reja, copa letre dhe shirit ngjitës me dy anë, të prera në shirita, u gjetën së fundmi në Attiko Allos, pranë pikës së pasaportave. Në të njëjtën kohë, vjehrra e Yu Ting u mor përsëri në pyetje në fund të gushtit, me pyetje që u përqendruan në një udhëtim pune që ajo kishte bërë në Shqipëri me nusen e saj.
Rasti Yu Ting mbetet një thriller i pazgjidhur që magjeps. Me telefonin celular dhe pasaportën në duart e autoriteteve, shpresa për të gjetur një pistë tjetër rizgjohet. A do të jenë në gjendje hetuesit të bashkojnë pjesët e këtij enigme dhe të nxjerrin në dritë të vërtetën? Përgjigjja, me sa duket, qëndron në çdo detaj të vogël e të copëtuar.
Zhdukja e Yu Ting
Një shtetase kineze 50-vjeçare, e quajtur Yu Ting, rezulton e zhdukur prej 20 majit në Greqi. E përfshirë në takime e transaksione të dyshimta në Shqipëri e Greqi, 50-vjeçarja ka ngritur në këmbë policinë greke, e cila po heton në disa pista me sfond kriminal.
Ditën e zhdukjes së saj, ajo ishte larguar nga shtëpia e saj në Artemida në orën 10:05 të mëngjesit për në qendër të Athinës. Sipas të afërmve të saj, atë mëngjes ajo kishte ndërmend të mblidhte qira nga apartamentet e kinezëve të pasur, ndërsa gjurmët e saj u zhdukën pasi zbriti nga autobusi.
Bashkëshorti i saj grek, Vasilis Karavasilis, ka thënë për mediat se gruaja e tij ose është rrëmbyer ose është vrarë. Vasilis Karavasilis shpjegoi se, deri më tani, nuk ka prova që do të çonin në një përfundim të prerë në lidhje me fatin e gruas së tij.
“Nuk mund të jem i sigurt nëse ajo është gjallë apo jo. Nuk ka asnjë indikacion në asnjërën anë. Mungojnë shumë informacione. Është e pamundur që ajo të jetë larguar me vullnetin e saj të lirë. Ne nuk ishim të shqetësuar për asgjë”, tha Karavasilis.
Hetimet
50-vjeçarja ishte pajisur me leje qëndrimi 1-vjeçare shqiptare nga Drejtoria Vendore e Kufirit dhe Migracionit Vlorë në 17.01.2026, për shkak të interesave të saj për të investuar në Shqipëri. Sipas dëshmive, leja e qëndrimit ishte marrë për shkak të interesit të saj në burimet e ujit në Bogovë.
“Një klient nga Kina po kërkonte një vendndodhje për të ndërtuar një impiant për shishet e ujit. Kjo ishte ajo me të cilën ata ishin “ngërthyer”, duke dashur të ndërtonin një impiant për shishet e ujit. Është një burim në një mal në Shqipëri. Ka ujë shumë të mirë, por asgjë nuk ka përparuar. Ajo shkoi dy herë”, tha një agjente pasurish të paluajtshme shqiptare për televizioni “MEGA”.
Në një tjetër rast, del sërish lidhja me shqiptarët. Konkretisht një dëshmitar tjetër, duke folur për mediat greke, i referohet një takimi që u zhvillua 4 ditë para zhdukjes dhe në të cilin ishin përfshirë Yu Ting, një agjente e pasurive të paluajtshme, një kinez, një prift dhe një oficer policie në pension.
“Në takim erdhi edhe kinezi, të cilin nuk e pashë më. Shkova, pimë kafe, ndenjëm për rreth 20 minuta, as gjysmë ore, dhe pastaj ikëm. Ishte si një njohje. Nuk pashë asgjë që e shqetësonte, që të kishte ndonjë frikë. Gruaja më dukej mirë.
E kam parë Yu Ting dy herë gjithsej. Një herë në kishë ku e solli agjentja e pasurive të paluajtshme. Dhe një herë tjetër kur e pashë në kafene. Fliste mirë greqisht. Dhe kur e pashë, hera e fundit që e pashë ishte, mendoj, e premte, më 16 maj”, tha prifti.
Arsyeja e takimit ishin pasuritë e paluajtshme.
Agjentja e pasurive të paluajtshme me origjinë shqiptare e prezantoi Ting-un si një grua që kërkonte me padurim prona në emër të klientëve të saj të pasur kinezë.
“B. është nga Shqipëria dhe burri i saj është grek. Dhe e njoh prej kohësh. Dhe një ditë ajo erdhi në kishë për të rezervuar një pagëzim dhe filluam të flasim për pasuri të paluajtshme.
Ajo më tha “Do të të sjell një grua kineze që është përfaqësuese e shumë kompanive, shumë njerëzve të pasur që kërkojnë prona të të gjitha llojeve, fusha, shtëpi, gjithçka për investime”. Dhe unë i thashë se kam disa njerëz seriozë që zotërojnë hotele dhe pasuri të paluajtshme. Kështu më vuri në kontakt me Tingun, i cili nga sa kuptoj kishte pasur një lidhje me zonjën për një kohë të gjatë”.
Media greke e gjeti shqiptaren, e cila konfirmoi se kishte punuar me Ting që nga viti 2022. Siç tha ajo, ata kishin treguar më shumë se 20 prona për investitorët kinezë, por pa përfunduar asnjë transaksion.
Motra e 50-vjeçares Yu Ting, duke folur për media greke, u shpreh:
“Ajo kishte marrë një leje qëndrimi, të vlefshme për një vit, për në Shqipëri”, duke theksuar se ajo i kishte thënë në një bisedë që kishin pasur më 29 prill se donte të shkonte në Shqipëri dhe madje i kishte thënë se do t’i tregonte disa parcela toke atje”.
Në një tjetër informacion për mediat greke, gruaja 50-vjeçare kineze dyshohet se është e përfshirë në një çështje biznesi që përfshin blerjen e një stacioni karburanti në qendër të Athinës. Njëra nga dy gratë kineze të përfshira në transaksion pretendon se është mashtruar nga Ting dhe partneri i saj.
“Yu Ting dhe partneri im më mashtruan”, thotë ajo.
“Ata më kërkuan të punoja me ta për të blerë një pikë karburanti. Na u desh të investonim 100,000 euro, të cilat i mora hua nga të afërmit dhe miqtë. Por më vonë thanë se nuk isha e përshtatshme si partnere dhe nuk ndodhi asgjë”.
