Një megaoperacion është vënë në lëvizje nga autoritetet greke për kapjen e Alket Rizait, i cili nuk është kthyer në burgun e Domokos pas përfundimit të lejes së tij. Sipas mediave greke, Rizai duhej të paraqitej në burg në orën 08:00 të mëngjesit të së hënës, 14 shtator, por nuk është kthyer në qeli pas përfundimit të lejes.
Policia greke ka nisur kërkimet për lokalizimin dhe kapjen e tij, por deri tani pa rezultat. Në kuadër të hetimeve është ngritur edhe dyshimi se Rizai mund të jetë larguar drejt Shqipërisë.
Sipas informacioneve të mbërritura te autoritetet greke, gjurma e fundit e tij është lokalizuar në Greqinë e Veriut. Kjo ka ngritur dyshimet se prej andej mund të ketë kaluar ilegalisht kufirin drejt Shqipërisë. Por, deri më tani, kjo mbetet vetëm një pistë e pakonfirmuar.
Vetëm një ditë para përfundimit të lejes për t’u rikthyer në burg, emri i Alket Rizait u raportua i lidhur me një ngjarje të rëndë të ndodhur më 13 shtator, ku u regjistruan të shtëna me armë zjarri dhe mbetën të plagosur dy persona. Sipas mediave greke, Rizai dyshohet se është personi që ka qëlluar me armë gjatë konfliktit.
Pas ngjarjes, ai është larguar, ndërsa të nesërmen nuk është paraqitur në burgun e Domokos, ku duhej të kthehej pas përfundimit të lejes. Në këto rrethana, autoritetet greke e kanë shpallur zyrtarisht në kërkim, ndërsa vijojnë hetimet për vendndodhjen e tij dhe rrethanat e largimit.
Kjo ishte leja e 17-të që Rizai kishte marrë që nga viti 2021. Në 16 rastet e mëparshme ai ishte kthyer në burg, ndërsa këtë herë vendosi të mos paraqitej në orarin e përcaktuar.
Alket Rizai është një emër i njohur për autoritetet greke dhe lidhet prej vitesh me botën kriminale.
Në vitin 2003, ai ishte personi i dyshuar për vrasjen e biznesmenit grek, Thanasis Koropiotis, pas një keqkuptimi që lidhej me partneren e tij. Në vitin 2006, Rizai u arratis me Vasilis Paleokostas, duke shkaktuar reagime të fortë mbi masat e sigurisë në burgjet greke.
Në gusht të po atij viti, Rizai akuzohet se vrau në Peristeri 43-vjeçarin Konstantinos Koutelieris dhe 36-vjeçarin Ioannis Katsios. Sipas hetimeve, vrasjet u kryen me urdhër të një prej figurave të fuqishme të mafies greke, Vasilis Stefanakos. Sërish, disa ditë më vonë, Rizai u arrestua nga policia. Megjithatë, edhe këtë herë, u arratis përsëri me helikopter në shkurt të vitit 2009 nga Korydallos.
Pasi u arrestua në 2009, ai tentoi një tjetër arratisje në vitin 2013. Këtë herë, zgjodhi një metodë tjetër, duke marrë peng pesë oficerë burgu në Malandrino.
Ndërkohë, në janar të 2021, ai kishte përfituar 5 ditë leje nga burgu, dhe u arrestua pasi u pikas duke drejtuar një automjet tip “BMW” së bashku me dy persona të konsideruar të rrezikshëm, gjatë një kontrolli të rastësishëm të trafikut.
