Një gjykatë shqiptare ka pezulluar nga detyra kreun e shërbimit sekret të vendit dhe ka urdhëruar vendosjen e saj në arrest shtëpie, nën dyshimin se ka nxjerrë informacione të klasifikuara, në kuadër të një hetimi më të gjerë për korrupsion, bëri të ditur të martën një zyrë e posaçme e prokurorisë.
Vlora Hyseni, e cila është me origjinë nga Kosova, ka shërbyer si drejtuese e Shërbimit Informativ të Shtetit (SHISH) që prej vitit 2023. Më parë, ajo ka shërbyer si zëvendësdrejtuese e shërbimit inteligjent në Kosovë.
Prokurorët thanë se Hyseni dyshohet se ka nxjerrë informacione të klasifikuara te persona të paautorizuar, në lidhje me një çështje korrupsioni në Agjencinë Kombëtare të Shoqërisë së Informacionit (AKSHI), e cila administron shërbimet publike digjitale dhe infrastrukturën informatike të Shqipërisë. Zyra e posaçme e prokurorisë, e njohur si SPAK, e ka ndjekur prej kohësh këtë çështje.
Hysenit nuk iu bë i mundur kontakti për të marrë një koment.
Shumë zyrtarë shtetërorë dhe biznesmenë janë arrestuar ose janë nën hetim për keqpërdorim të parave publike në AKSHI.
SPAK-u, i cili lufton korrupsionin dhe krimin e organizuar, tha se masat ndaj Hysenit u miratuan nga një gjykatë kundër korrupsionit, për t’i hapur rrugë vijimit të hetimeve. (Reuters)
