Kompania e Ermal Beqirit, biznesmenit të arrestuar në Francë për llogari të hetimeve të SPAK mbi aferën e tenderave të AKSHI-t, vijon të përfitojë kontrata publike nga institucionet shtetërore.
Sipas një investigimi të emisionit “Në Shënjestër” në News24, shoqëria “Soft & Solution”, e lidhur me Beqirin, ka siguruar një kontratë me Korporatën Elektroenergjetike Shqiptare (KESH), me vlerë rreth 10 mijë euro.
Tenderi ka si objekt mirëmbajtjen e sistemit financiar të KESH-it, ndërsa procedura është administruar nga Joana Bushi, ish-bashkëpunëtore e afërt e Belinda Ballukut në Ministrinë e Infrastrukturës dhe Energjisë.
Bushi rezulton aktualisht e angazhuar në menaxhimin e procedurave të prokurimit pranë KESH-it, pasi më herët kishte punuar pranë ish-zëvendëskryeministres Balluku.
Ajo që ngre pikëpyetje është fakti se kompania e Beqirit vijon të fitojë kontrata shtetërore, ndërkohë që emri i biznesmenit dhe aktiviteti i shoqërisë së tij janë pjesë e hetimeve të SPAK për tenderat e AKSHI-t.
Sipas dokumenteve hetimore të referuara në investigim, Ergys Agasi dyshohet se ka përfituar shuma të konsiderueshme parash përmes kompanisë së tij “EA Solution”, nga operatorët “Soft & Solution”, “Fastech” dhe “First”.
Pagesat janë justifikuar formalisht si shërbime të kryera, por SPAK dyshon se në të vërtetë kanë shërbyer si shpërblime për favorizimin e kompanive në tenderat e Agjencisë Kombëtare të Shoqërisë së Informacionit.
Hetuesit kanë konstatuar se “EA Solution” nuk dispononte kapacitetet teknologjike dhe burimet njerëzore të nevojshme për realizimin e shërbimeve të faturuara.
Në dosje përmenden edhe përfitime të tjera të dyshuara të Agasit, përfshirë verëra të shtrenjta me vlerë mbi 900 mijë euro.
Sipas SPAK, në qendër të skemës së dyshuar kanë qenë lidhjet e Agasit dhe Beqirit me ish-drejtuesen e AKSHI-t, Mirlinda Karçanaj, e cila u largua nga detyra pas përfshirjes në hetime.
Ndërkohë, kontrata e re e KESH-it ngre pikëpyetje mbi kriteret e ndjekura për përzgjedhjen e kompanisë dhe verifikimet që janë kryer përpara lidhjes së saj.
Pavarësisht vlerës relativisht të vogël të tenderit, objekti i kontratës lidhet me mirëmbajtjen e një sistemi financiar të një prej ndërmarrjeve më të rëndësishme publike në vend.
Për këtë arsye, mbetet për t’u sqaruar nga KESH se si është zhvilluar procedura, sa operatorë kanë marrë pjesë dhe çfarë verifikimesh janë kryer për kompaninë fituese.
Zhvillimi vjen ndërsa hetimet për aferën e AKSHI-t vijojnë, me SPAK që po shqyrton dyshimet për paracaktimin e tenderave dhe transferimin e miliona eurove përmes kontratave të dyshuara fiktive.
