Ka ndërruar jetë në spitalin e Traumës, 52-vjeçari Eduart Reçi, i cili rreth orës 23:00 të mbrëmjes së djeshme ra pre e një atenatit mafioz në Tiranë, duke u qëlluar me plumb në kokë.
Pas ngjarjes ai u dërgua me urgjencë në spitalin e Traumës në Tiranës, ku po luftonte me jetën, një betejë të cilën fatkeqësisht nuk ka arritur ta fitojë dot.
Në momentin e atentatit ai ndodhej pranë një lokali në rrugën “Faik Konica”, pranë “Rrugës së Elbasanit”, teksa edhe banesa e tij ndodhej pranë Fakultetit të Histori-Filologjisë.
Reçi është i njohur për aktivitetin e tij në ndërtim, pasi ka ndërtuar disa pallate pranë zonës ku iu bë atentati. Biznesmeni i ndërtimit me origjinë nga Dibra është pronari i kompanisë “ELGM.shpk”.
Forca të shumta policia rrethuan vendin e ngjarjes pas atenatit, por deri më tani ende nuk ka asnjë gjurmë nga autorët. Blutë e kryeqytetit përmes një komunikate të shkurtër për mediat bënë me dije se po punon për identifikimin dhe kapjen e tyre.
“Më datë 13.11.2024, rreth orës 23:00, në rrugën “Faik Konica” është plagosur me armë zjarri shtetasi E. R., 52 vjeç, i cili aktualisht ndodhet në spital, në gjendje të rëndë shëndetësore. Një grup i posaçëm hetimor, nën drejtimin e Prokurorisë, vazhdon punën për sqarimin e rrethanave të ngjarjes, identifikimin dhe kapjen e autorit/ëve të dyshuar. Informacion më të detajuar mbi këtë ngjarje do të japim në vijim.” – thuhet në njoftimin e Policisë së Tiranës.
Autoritetet po hetojnë për zbardhjen e rrethanave të kësaj ngjarjeje të rëndë, duke shqyrtuar prova të mundshme dhe duke analizuar të dhënat e kamerave të sigurisë.
Viktima ka patur vetëm një plumb në kokë. Burime pranë grupit hetimor bëjnë me dije se nga kqyrja e kamerave të sigurisë në zonë nuk shfaqen autorët, gjë që ngre dyshime mbi mënyrën e kryerjes së sulmit. Dyshohet se Eduart Reçi mund të jetë qëlluar nga një distancë e largët, teksa rrethanat mbeten ende të paqarta.
