Ditën e sotme qarkulloi me shpejtësi lajmi se kreu i SPAK, Altin Dumani ka rritur sigurinë. Sipas burimeve mediatike, ai lëviz me makinë të blinduar dhe policia ka vënë në ruajtje banesën. Vetë SPAK deklaroi se siguria e tij është në bazë të protokollit, ndërsa vetë ministri i Brendshëm, Taulant Balla mohoi që ai të kishte kërkuar shtim të sigurisë.
Por për avokatin, Spartak Ngjela, rritja e sigurisë së kreut të SPAK është një ogur i mirë. Sipas tij, kjo tregon se gjërat kanë nisur të lëvizin dhe të korruptuarit janë trembur.
“Ne nuk kemi një të dhënë që ky është një akt që përfshin të gjithë SPAKU-un, kështu që do mendojmë që shërbimet kanë të dhëna të njerëzve të caktuar që mund të kenë krijuar skema për të eliminuar kreun e SPAK-ut”, tha Ngjela.
Ngjela ka renditur arsyet se pse mund të ketë rritur sigurinë Dumani, ndërsa i mëshon më shumë faktit se SPAK po përgatitet për arrestime të bujshme këto ditë dhe jo se ka pasur ndonjë kërcënim ndaj kryeprokurorit. Sipas Ngjelës, mund të ketë goditje të bujshme dhe kreu i SPAK ka marrë masa.
“Fakti që është vetëm Dumani, kuptohet se dy janë arsyet. Se ky është shefi i SPAK. Ose është një dosje që mund të vinin dhe të bënin presion. Qoftë edhe me jetën. Ose pastaj ka tronditur rrjetet e korrupsionit. Fakti që ka shkuar Dumani atje, ka pasur reaksione të këtij niveli. Por ka dhe një arsye të tretë që do të rritet akuza penale në numër gjatë muajit shtator. Kjo është shenjë se do ketë zhvillime. I kanë dhënë mbrojtje. Nga kush mbrohet? Nga korrupsioni dhe krimi i organizuar, s’ka tjetër rrezik. Fakti që ka mbrojtje është shenjë pozitive për të ardhmen, pasi këta janë duke rritur goditjet. Si duket këta janë në qepjen e dosjeve penale të rëndësishme. Ata nuk janë vonuar sepse kanë pasur frikë. Janë vonuar nga fakti se gjithçka përkthehet. Edhe kjo është vonesë. Megjithatë unë e shoh pozitive sepse ata nuk të vënë mbrojtje kot”, tha Ngjela në një intervistë televizive.
Sipas tij, gjithkush duhet ta dijë se mafia e godet prokurorin e ndershëm. Prandaj avokati u shpreh se siguria e prokurorëve të SPAK duhet të jetë maksimale.
“Këtu kemi dy gjëra. Mbrojtja e përgjithshme e tyre duhet të jetë speciale sepse janë kundër krimit të organizuar dhe korrupsionit. Ka eksperienca botërore që këta janë qëlluar. Pra janë goditur. Ne nuk kemi. Por gjithsesi tani po ndeshet pushteti gjyqësor me krimin e organizuar dhe korrupsionin. Ata duhet të kenë mbrojtje. Për faktin se nuk kemi të dhëna se ky është një akt që përfshin gjithë SPAK do mendojmë se shërbimet kanë të dhëna të njerëzve të caktuar që mund të kenë krijuar skema apo dëshira për të eliminuar kryetarin e SPAK”, vijoi ai.
