Anëtarët e Partisë Social-Demokrate të Tom Doshit në Këshillin Bashkiak të Shkodrës kanë paralajmëruar se do të bojkotojnë edhe mbledhjen e nesërme.
Në rend të ditës është edhe pika e dhënies së një sipërfaqe të madhe të rërës në plazhin e Velipojës në administrim të ndërmarrjes “Bio Strajca sh.a”, me qëllim që shezllonet në këtë sezon veror t’i vendosë kjo shoqëri aksionere e administruar nga bashkia dhe jo më privatët apo operatorë turistik siç ka qenë më përpara.
PSD hedh akuza se administrimi i plazhit të Velipojës do të bëhet nga një kompani e lidhur me bashkëshorten e kryebashkiakut të Shkodrës, Benet Beci.
“Benet Beci kërkon të kalojë në administrim plazhin e Velipojës shoqërisë aksionare të bashkisë Shkodër “Bio Strajca sh.a” dhe më pas një kompanie të lidhur me bashkëshorten e tij. Benet Beci kërkon t’u grabisë qytetarëve hapësirat publike në Velipojë dhe t’i kthejë me pagesë, kaq i pangopur është.” – thuhet në deklaratë.
Kjo pikë do të miratohej nga Këshilli Bashkiak i Shkodrës që në mbledhjen e 8 Prillit, por ajo mbledhje u braktis si nga këshilltarët e PSD-së, po ashtu edhe ata të PD-së, duke bërë që kuorumi të mos plotësohej.
Braktisjet e mbledhjeve së Këshillit Bashkiak nga PSD, vijnë edhe pas disa shkarkimeve të drejtorëve rajonal të PSD-së në qarkun Shkodër, përpara zgjedhjeve parlamentare të 11 majit.
DEKLARATË PËR SHTYP
Shkodër, më 6 maj, 2025
Partia Social Demokrate, dega Shkodër
PSD nuk do të marrë pjesë në mbledhjen e Këshillit Bashkiak të Shkodrës më 7 maj, vetëm katër ditë para zgjedhjeve parlamentare, ku përveç ndihmës sociale prej 6%, Benet Beci kërkon të kalojë në administrim plazhin e Velipojës shoqërisë aksionare të bashkisë Shkodër “Bio Strajca sh.a” dhe më pas një kompanie të lidhur me bashkëshorten e tij.
Ne nuk kushtëzojmë askënd dhe jemi të gatshëm të votojmë ndihmën sociale më 13 maj, pas zgjedhjeve, por nuk bëhemi palë me korrupsionin e Benet Becit.
Benet Beci kërkon t’u grabisë qytetarëve hapësirat publike në Velipojë dhe t’i kthejë me pagesë, kaq i pangopur është. Ne si PSD do ta denoncojmë dhe do kërkojmë hetim për çdo tenderim të dyshimtë.
PSD nuk bën kompromis me abuzimin dhe kapjen e pasurive publike nga ana e kryebashkiakut Beci.
Mbetemi të palëkundur në mbrojtjen e interesit publik dhe jemi të vendosur të jemi zëri i qytetarëve dhe jo fasada e marrëveshjeve të fshehta politike apo familjare të kryetarit të bashkisë.
Ne ritheksojmë se jemi në mbështje të familjeve në nevojë të cilat janë thelbi i programit të PSD në këto zgjedhje dhe po ashtu jemi të gatshëm që ta votojmë kurdo herë pas 11 majit fondin 6% të ndihmës sociale.
