Bernard Berisha mund të konsiderohet si “goditja” më e bujshme e kësaj merkato vere për Kategorinë Superiore në Shqipëri.
Mesfushori anësor i kombëtares së Kosovës, i cili shkëlqeu me Besën e Kavajës dhe Skënderbeun, ka firmosur për Dinamo City, duke u ribashkuar kështu me ish-trajnerin e tij, Ilir Daja.
Lajmi është konfirmuar nga vetë klubi i Dinamos, përmes një postimi në rrjetet sociale, ku ka publikuar edhe një foto të Berishës me presidentin e klubit
“Bernard Berisha vishet blu!
Bernard Berisha është lojtari më i ri i Dinamo City. Presidenti Adrian Bardhi, ka bërë surprizën e radhës, duke arritur të bindë futbollistin kosovar për të veshur fanellën blu.
Sulmuesi i njohur sjell eksperiencë ndërkombëtare te “Nëndetësja” jonë… Ai ka luajtur me përfaqësuesen e Kosovës dhe në Rusi.
Berisha gjithashtu e njeh mjaft mirën futbollin shqiptar, pasi më parë ka veshur fanellën e Besës dhe Skënderbeut. Ai vjen si një vlerë e shtuar për skuadrën dhe trajnerin Ilir Daja.” – shkruan Dinamo City.
Tek nëndetësja blu duket se Bernard Berisha do të zëvendësojë Baton Zabërgjën, i cili u shit në Ukrainë. 33-vjeçari kishte oferta edhe nga Ballkani në Kosovë, Flamurtari në Shqipëri dhe disa klube të huaja, por duket se vendimtar ka qenë marrëdhënia e tij me Ilir Dajën, me të cilin ka luajtur me fanellën e Skënderbeut edhe në grupet e Europa League.
Gjatë karrierës së tij Berisha ka fituar 3 trofe në elitën e futbollit shqiptar 2 kampionate dhe 1 Superkupë, me fanellën e Skënderbeut.
Prej vitit 2016, sulmuesi shqiptar i Kosovës, ka qenë pjesë e futbollit elitar rus, ku është aktivizuar me Anzhin, Terek Groznin dhe së fundmi Akhmat Groznin.
Në total ai ka luajtur 201 ndeshje në elitën e futbollit rus, ku ka shënuar 26 gola dhe 98 ndeshje në Kategorinë Superiore ku numëron 14 gola të shënuar. 
