Në vitin 2016, ministria e Infrastrukturës dhe Energjisë shpenzoi plot 20 milionë euro për rrjetin e energjisë elektrike nga Orikumi në Himarë, teksa në atë kohë u trumbetua se “kjo reformë do të sjellë stabilitet dhe furnizim pa ndërprerje”.
Paratë janë hedhur me tendera në të ashtuquajturën “koperacioni Italian në zonën e Himarës”, ndërkohë që pas kësaj kohe banorët por edhe vetë mazhoranca ka pranuar se ka pasur probleme.
Zona e bregut të detit, por edhe fshatrat e Himarës në Lumin e Vlorës, janë ankuar shpeshherë për ndërprerje të vazhdueshme të furnizimit me energji elektrike, pavarësisht se janë hedhur dhjetëra miliona euro. Reforma duket se ka dështuar, njëjtë siç ka dështuar edhe reforma e ujit apo ajo e kanaleve të zeza.
Dhe, në gjithë këtë situatë, Operatori i Sistemit të Shpërndarjes, dega Vlorë, bën gati një tjetër tender të ri. Do të ribëjë nga e para rrjetin në të gjithë zonën! Por, ku shkuan paratë e Gjiknurit?! A mos duhet një hetim i mirëfilltë për dështimin e të gjithë kësaj “reforme”?!
Faksimile: Njoftimi i tenderit nga OSSH në vitin 2025, ku janë akorduar 2 milionë euro për rrjetin e energjisë në Himarë
Vetë Operatori i Sistemit të Shpërndarjes, që dikur kontrollohej nga Damian Gjiknuri, gjatë kohës që ai ishte ministër i Infrastrukturës dhe Energjisë, ka hapur një tender të ri.
Sipas dokumenteve që disponon VoxNews, objekti i procedurës së prokurimit është “ndërtim i rrjetit TM/TU jashtë koperacionit Italian në zonën e Himarës”. Vlera e tenderit është 199,747,032 lekë, ose mbi 2 milionë euro. Kërkohet rrjet i shpërndarjes së energjisë elektrike dhe shërbime të lidhura me këtë procedurë.
Por, a nuk u bë rrjeti me “koperacionin Italian”?! Natyrisht që po, pasi mjafton që të hapen dokumentet në ministri apo edhe në OSHEE apo bijën e saj OSSH dhe do të kuptohet se për këtë rrjet që po ri investohet janë hedhur plot 20 milionë euro.
Në foto: Faqja e internetit e Ministrisë së Infrastrukturës dhe Energjisë, ku në vitin 2016 ish-ministri Gjiknuri tha se janë investuar 20 milionë euro në Himarë
Në vitin 2016, sipas hulumtimeve që kreu VoxNews, Damian Gjiknuri në pozicionin e ministrit të Infrastrukturës dhe Energjisë do të mbante një fjalim të gjatë në Sarandë.
“Nuk na vjen mirë që në sezone turistike, për shkak të ngarkesave, sistemi elektroenergjetik nuk mban nisur nga linjat e amortizuara. Praktikisht, kemi siguruar fondet, kemi 10 milionë euro nga Koperacioni Italian dhe janë 10 milionë euro të tjera nga vetë kompania me të cilat ne do të përfundojmë edhe gjithë pjesën e bregdetit” tha Gjiknuri.
Në foto: Faqja e internetit e Ministrisë së Infrastrukturës dhe Energjisë, ku në vitin 2016 ish-ministri Gjiknuri tha se janë investuar 20 milionë euro në Himarë
Në dhjetor të vitit 2016, ai shtoi se puna do të niste në muajin shkurt 2017, të ndërtimit të dy nënstacioneve shumë të fuqishme, një në Orikum dhe një në Himarë, dhe që është pjesë komplomentare e gjithë jugut. “Këto do të bëjnë që i gjithë bregdeti jonian, siç u përmend dhe më parë, një potencial i jashtëzakonshëm nga të gjitha drejtimet dhe një zonë me shumë tradita që vlen të vizitohet, të ketë infrastrukturën energjetike që meriton” pohoi ai.
Në foto: Lokali ku drekoi Rama mbeti pa drita dhe ankesat e banorëve
Por, a ka pasur drita të vazhdueshme në bregdet? Çdo vetë, pushues dhe banorët vendas ankohen për kufizime të gjata të furnizimit të energjisë elektrike në bregdet apo edhe fshatra.
Në foto: Lokali ku drekoi Rama mbeti pa drita dhe ankesat e banorëve
“Në Himarë dritat ikin çdo ditë, kjo ndoshta për ti treguar turistëve të huaj që ky fenomen është pjesë e ‘autenticitetit shqiptar’. Ç’i duam dritat në Himarë, më mirë pa drita e ujë se sa të na mërzitet administrata e Bashkisë së Himarës që po bën aq shumë për të shfaqur Autenticitetin” kanë treguar banorët vendas disa muaj më parë, praktikisht në viti 2025.
Ndërkohë, në verën e vitit 2024 ishte edhe një lajm bombastik; në lokalin ku drekoi Rama, ikën dritat! Një vit më parë, kryeministri zhvilloi një takim me simpatizantë në një lokal buzë detit në Himarë. Në momentin që ai ishte në ambientet e lokalit, kishte dritat. Por ato janë stakuar sapo ai ka dalë te porta. Vetë kryebashkiaku e ka pranuar se në atë zonë është ndërprerë energjia elektrike, sapo KM është larguar.
Në foto: Statusi i deputetit Vullnet Sinaj në vitin 2018, ku ankohet për mungesën e dritave në Himarë
Ndërkohë, të tjerë politikanë kanë qenë dëshmitar të reformës së dështuar të energjisë në Himarë. Deputeti Vullnet Sinaj ka bërë një status të gjatë në vitin 2018, ku ankohen se “era fryn në Himarë, dritat ikin në Kuç…Terbaç…Kotë…. Smokthinë…Sevaster…Gorrisht….Armen…Selenicë”.
“Kjo thënie, u bë lajtmotivi i shqetësimeve të banorëve të Zonës së Lumit të Vlorës përgjatë gjithë fushatës së kandidimit tim për deputet, por edhe më mbas, gjatë takimeve të mija në zonë. Kam pasqyruar çdo linjë me pamjet përkatëse të telave përcjellës, izolatorëve e kabinave të transformimit, të cilat që nga vitet ’70 nuk ishin riparuar” tha Sinaj.
Por, a nuk u hodhën 20 milionë euro nga Gjiknuri, që është rizgjedhur bashkë me Sinajn deputet në vitin 2025?! Aq më tepër, që e njëjta mazhorancë akordon edhe 2 milionë euro të tjera për të rregulluar gabimet e atëhershme.
