Komisioni Europian ka propozuar vendosjen e sanksioneve ndaj Izraelit për shkak të gjendjes katastrofike humanitare në Rripin e Gazës, porGjermania ka dalë hapur kundër këtij plani, duke nxjerrë në pah ndarjet e thella brenda bllokut europian.
Sipas Komisionit, masat do të konsistonin në pezullimin e përkohshëm të pjesëmarrjes së Izraelit në programin e madh të kërkimeve shkencore “Horizon Europe”, sidomos në projektet që lidhen me teknologji sensitive si inteligjenca artificiale, dronët dhe siguria kibernetike.
Qëllimi i këtij vendimi do të ishte ushtrimi i presionit mbi qeverinë izraelite për të ndryshuar qasjen ndaj luftës në Gaza dhe për të frenuar pasojat humanitare.
Por Berlini nuk është dakord me këtë qasje. Ministri i Jashtëm gjerman, Johann Wadephul, ka deklaruar se sanksionet e propozuara nuk do të ndryshojnë politikën e Izraelit dhe as nuk do të ndalojnë veprimet e tij ushtarake.
Ai i cilësoi ato si masa simbolike që nuk sjellin rezultat, duke theksuar se Gjermania tashmë ka kufizuar eksportet e armëve drejt Izraelit, një hap që sipas tij është më i drejtpërdrejtë dhe më i përshtatshëm.
Wadephul shtoi se ajo që nevojitet tani është gatishmëria për të rënë dakord për një armëpushim nga të gjitha palët ndërluftuese dhe jo vendosja e kufizimeve në fushën e shkencës.
