Shefi i Agjencisë Ndërkombëtare për Energji Bërthamore (IAEA), Rafael Grossi, ka paralajmëruar për rritjen e rrezikut bërthamor dhe për mundësinë që numri i shteteve me armë bërthamore të rritet ndjeshëm në të ardhmen.
“Pa dashur të përhap panik, rreziku i një konflikti bërthamor është më i madh sot sesa në të kaluarën”, ka thënë Grossi në një intervistë për të përditshmen italiane La Repubblica. Ai ka sugjeruar se në një moment të caktuar, nga 20 deri në 25 shtete mund të pajisen me armë bërthamore, megjithëse nuk ka përmendur afate kohore për këtë zhvillim.
Aktualisht, sipas ekspertëve, në botë janë vetëm nëntë shtete që posedojnë armë bërthamore. Megjithatë, sipas Grossit, procesi i çarmatimit apo i zvogëlimit të kontrolluar të arsenalit bërthamor ka mbetur i bllokuar.
“Ato shtete që posedojnë armë bërthamore janë duke prodhuar më shumë sosh, përfshirë Kinën”, ka shtuar ai, duke nënvizuar se situata po bëhet gjithnjë e më shqetësuese. Shefi i IAEA ka tërhequr gjithashtu vërejtjen për rritjen e retorikës mbi përdorimin e armëve bërthamore taktike, të cilën e ka përshkruar si një zhvillim tepër alarmues për sigurinë globale.
© 2026 Gazeta Korrieri.