TIRANË – Rrjeti i telefonisë celulare dhe internetit “ONE” ka bllokuar përkohësisht aksesin në disa faqe informative me domain “.al”, përfshirë edhe faqen zyrtare të Kryeministrisë.
Sipas njoftimit të kompanisë, këto faqe u vlerësuan si “të pasigurta”, pasi hyrja në to mund të rrezikonte sigurinë e përdoruesve. ONE paralajmëroi se vizitimi i tyre mund të lejonte vjedhjen e të dhënave sensitive si fjalëkalime, mesazhe apo informacion kartash krediti.
Kompania u kërkoi qytetarëve që të mos hynin në faqet e listuara derisa të sqarohej situata dhe të merreshin masa për sigurimin e tyre.
Bllokime edhe për media ndërkombëtare
Përveç faqeve shqiptare, përdorues të shumtë raportuan se për disa orë nuk mund të aksesonin as portale ndërkombëtare të njohura. Megjithatë, pas disa orësh bllokimi u hoq dhe faqet u rikthyen të aksesueshme normalisht.
Pavarësisht shqetësimeve të ngritura nga përdoruesit, ONE nuk dha asnjë shpjegim zyrtar mbi shkakun e bllokimit të faqeve mediatike të huaja.
Ngjarja ka ngjallur debat mbi mënyrën se si operojnë kompanitë e shërbimeve të internetit dhe masat që ato marrin për të garantuar sigurinë e përdoruesve, por edhe për transparencën që duhet të shoqërojë vendime të tilla.
