Majlinda Taga, bashkëshortja e biznesmenit italian që u vra në Tepelenë, ka folur për herë të parë pas ngjarjes, duke shuar çdo dyshim për një konflikt mes Edoardo Sarchit, dhe ortakëve të tij, anëtarëve të familjes Braçi. Në një rrëfim për Report tv, Taga është shprehur se bashkëshorti i saj dhe Gazmend Braçi kanë qenë shumë të afërt, madje e cilësonin njëri tjetrin si vëllezër, dhe kalonin bashkë çdo fundjavë, dhe me familjet e tyre. Sa i takon dinamikës së ngjarjes, Taga shprehet se sherri mes autorit Kamber Sulçajt dhe Gazment Braçit ka nisur për motive banale, dhe më pas ka shkuar dhe Edoardo dhe Eqerem Braçi pranë tyre.
“E përbaltën figurën e tij, na shkatërruan, na vranë për së qindti herë. Një njeri si Edoardo nuk lind për së dyti, kush e njeh e di. Gazmend Braçin e kishte si vëllain e vet, e donte si vëlla, Madje kishte mësuar dhe shqip dhe i thoshte “Vdeksha për ty”.
Prej 2 vitesh kur është bërë bujtina e Gazmend Braçit në Salari, ku rrimë të gjithë familjarisht, shkojmë çdo fundjavë me miqtë, me shokë, me fëmijët. Është e vështirë për mua të mendoj se në ato rrugë ku kemi kaluar me fëmijët tanë kanë vrarë Edoardon.
Në fillim me të është përballur vetëm Gazmend Braçi, ku ka nisur një debat që ai nuk e ka vlerësuar fillimisht që do arrinte deri në përdorimin e armës, për dritat e gjata të makinës. Nuk i ka dhënë rëndësi, dava pijaneci ka thënë. Më pas ka shkuar dhe Sarchi”.
Detaje të reja kanë dalë në dritë nga vrasja e ndodhur në orët e para të mëngjesit të së shtunës në zonën e Salarisë në Tepelenë, ku mbeti viktimë biznesmenit italian Edoardo Sarchi. Policia ka identifikuar autorin e vrasjes, i cili është ende në kërkim, shtetasi Kamber Sulçaj, ndërsa konflikti ka ndodhur për motive të dobëta.
Kamber Sulçaj ishte duke udhëtuar me makinë drejt stanit të tij, jo shumë larg vendit të ngjarjes. Rrugës ai është shkëmbyer me një makinë me të cilën po lëvizte Gazmend Braçi me disa miq të tij. Mes tyre ka nisur një debat për shkak të dritave të gjata që Braçi mbante, ndërsa Sulçaj e ka akuzuar se po e verbonte, duke sharë dhe fyerje në drejtim të tyre, debat verbal që ka vijuar për disa minuta.
Gazmend Braçi është nisur me makinë drejt shtëpisë së tij më Salari, por autori i dyshuar i vrasjes i ka ndjekur nga pas. Në një moment, makina e Braçit është prishur dhe ka telefonuar babanë e tij, Eqerem Braçi, dhe i ka kërkuar të shkonte ti merrte pasi makina i kishte lënë. Eqerem Braçi është nisur me dy makina, bashkë me italianin Sarchi.
Momenti i të shtënave
Sapo kanë arritur atje, në drejtim të makinave është qëlluar me armë, kur një plumb ka prekur italianin. Për disa minuta, Kamber Sulçaj nuk i ka lënë të lëvizin, pasi ka vijuar të qëllojë në drejtim të tyre. Pasi është larguar, makinën e ka fshehur në një zonë të thellë poshtë një peme. 2 dëshmitarë që kanë kaluar rastësisht në rrugë me motoçikletë, dhe kanë dëgjuar sherrin, dhanë dëshminë kyçe që bënë të mundur identifikimin dhe shpalljen në kërkim të autorit. Ata kanë treguar se nuk kishin mundur të shihnin personat për shkak të errësirës, por kishin dëgjuar debatin mes tyre dhe më pas të shtënat e armës. Ata i thanë policisë tipin e automjetit të autorit, dhe targat, të cilat më pas përputheshin me pamjet e kamerave të sigurisë.
Çfarë tregoi ekspertiza
Nga ekspertiza paraprake, italiani Sarchi u qëllua me një plumb në pjesën e sipërme të kofshës. Plumbi ishte tejshpues, nga pjesa e pasme dhe ka dalë para. Fillimisht, personat që e shoqëronin i kanë dhënë ndihmën e parë duke i lidhur këmbën, por për shkak se plaga ishte e madhe, Sarchi humbi gjak, çka i shkaktoi edhe vdekjen. Sipas ekspertizës, autori ka përdorur për të kryer krimin një armë zjarri pushkë me viaska me dylbi nate, nga ajo që përdoret për gjuetinë. Pavarësisht kontrolleve, autori nuk është mundur të gjendet, por banorët, ose njerëzit që e njihnin, e përshkruajnë si person që kishte varësi nga alkooli, dhe kur ishte në gjendje të dehur shfaqte shenja agresiviteti. Madje, edhe në momentin e krimit, dyshohet se ishte në gjendje të dehur.
Si nisën dyshimet për anëtarët e familjes Braçi
Fillimisht, personat që u shoqëruan në polici u dyshuan si autorë nga hetuesit, por dëshmitë e dëshmitarëve që panë sherrin, përputheshin me dëshmitë e tyre. Megjithatë, edhe përgjigja e mjekësisë ligjore i përjashtoi nga të qenit të dyshuar, për shkak të armës që ishte qëlluar Sarchi. Arma e krimit nuk është gjetur, por në vendin ku policia gjeti makinën, u gjetën edhe sende të tjera me rëndësi. Mes tyre një dylbi që dyshohet se është e armës së krimit, që Kamber Sulçaj e ka marrë me vete. Po ashtu, një tjetër provë me rëndësi për hetimin është edhe një dokument leje e armës pushkë me viaska me dylbi nate, në emër të tij, e cila përputhet me armën e krimit.
