Kandidati i opozitës për Bashkinë e Tiranës, Florian Binaj, ka vlerësuar përvojën e tij si administrator pallati si një nga mësimet më të vlefshme për menaxhimin e një institucioni publik. I ftuar në emisionin Top Story, Binaj tha se veprimi i tij i parë në rast fitoreje do të jetë një auditim i plotë i Bashkisë së Tiranës.
Ai kujtoi se ka studuar për pikturë dhe inxhinieri ndërtimi, duke e përshkruar këtë formim si kombinimin ideal midis estetikës dhe strukturës teknike. Në lidhje me vizionin e tij për qytetin, Binaj theksoi se ndërtimet e reja duhet të zhvendosen nga qendra drejt periferisë, ndërsa theu iluzionin e pritshmërive të menjëhershme:
“Në dy vite me grupin më të mirë të ekspertëve nuk mund të bëjmë magji dhe të prishim ndërtimet që janë bërë, por do të bëjmë një studim për çfarë ka realisht nevojë Tirana.”
Binaj deklaroi gjithashtu se nuk do të marrë asnjë fond nga partitë politike për fushatën zgjedhore, por do të kërkojë mbështetjen e qytetarëve, duke përjashtuar çdo ndikim nga oligarkët.
Në fund, ai u shpreh i bindur se kandidimi për Tiranën është vetëm fillimi i një angazhimi afatgjatë në politikë.
