Një atentat mafioz tronditi sot mesditën zona pranë Aeroportit të Rinasit, ku u ekzekutua Gilmando Dani, i njohur si krahu i djathtë i Emiljano Shullazit. Ngjarja ndodhi rreth orës 14:20, vetëm 100 metra larg hyrjes kryesore të aeroportit “Nënë Tereza”, në një zonë të mbushur me kalimtarë dhe automjete.
Dani udhëtonte në një makinë të bardhë luksoze “Mercedes Benz S”, në vendin e pasagjerit, ndërsa mjeti drejtohej nga Muçi Shaljani, 40 vjeç, i cili mbeti rëndë i plagosur dhe ndodhet në kujdesin intensiv në spital. Autorët, të maskuar dhe të armatosur, hapën zjarr nga një makinë Toyota Yaris me targa greke, duke qëlluar në lëvizje. Makina e tyre u gjet pak më vonë e djegur në fshatin Halil të Krujës, rreth 10 kilometra larg vendit të krimit — një skenar tipik i atentateve të porositura.
Sipas burimeve hetimore, autorët kanë ndjekur makinën e Danit për rreth tre kilometra dhe kanë vepruar në momentin kur ishin të sigurt për praninë e tij. Gilmando Dani kishte mbërritur pak minuta më parë nga Barcelona, ndërsa në aeroport ishte pritur pikërisht nga Shaljani. Hetuesit dyshojnë se lëvizjet e tij ishin të monitoruara prej ditëshdhe se atentatorët kishin informacion të saktë për itinerarin e tij — çka ngre dyshime se dikush nga rrethi i tij e ka spiunuar.
Pamjet e para tregojnë momentin e ndërhyrjes së policisë dhe kalimtarëve, të cilët thyen xhamin e makinës për të nxjerrë trupin e pajetë të Danit. Policia rrethoi menjëherë zonën, ngriti pika kontrolli në të gjitha rrugët hyrëse dhe doli me një njoftim zyrtar duke konfirmuar se po punohet për identifikimin dhe kapjen e autorëve.
Kush ishte Gilmando Dani?
47-vjeçari i vrarë ishte një nga figurat më të njohura të botës së krimit në Tiranë dhe një nga njerëzit më të afërt të Emiljano Shullazit. Ai kishte dalë nga burgu vetëm një vit e gjysmë më parë, pasi kishte përfunduar dënimin si pjesë e grupit të strukturuar kriminal të Shullazit, i dënuar në vitin 2018 me 12 vite burg për gjobëvënie dhe organizatë kriminale.
Dani kishte një të kaluar të ngarkuar me precedentë penalë: në vitin 2006 u arrestua nga forcat RENEA për armëmbajtje pa leje dhe kanosje, në të njëjtin operacion ku u arrestua edhe vetë Shullazi. Në banesat e tyre u sekuestruan armë automatike, radio-përgjues policie, maska dhe pajisje kamuflazhi.
Në vitet që pasuan, Dani u përfshi në disa ngjarje të tjera të rënda, përfshirë hetime pas masakrës së Dritan Dajtit në Durrës (2009), ndërsa në 2011 u shoqërua nga policia gjatë një incidenti ku Shullazi pengoi një miting elektoral të Partisë Socialiste në Tiranë.
Gjatë jetës së tij, Gilmando Dani i mbijetoi dy atentate të tjera, në vitet 2011 dhe 2015, nga të cilat doli i plagosur, por mbijetoi. Atentati i sotëm, megjithatë, ishte fatal dhe i realizuar me profesionalizëm të lartë, duke ngritur dyshime se pas tij fshihet një rreth i ngushtë që njihte mirë lëvizjet dhe mbrojtjen e tij.
Policia dhe Prokuroria e Tiranës po ndjekin disa pista, përfshirë edhe shkelje të mundshme të heshtjes brenda grupit të Shullazit, për të zbuluar kush e spiunoi Gilmando Danin dhe kush urdhëroi ekzekutimin e tij..korrieri
