Mijëra qytetarë shqiptar po ekspozohen përballë një mashtrimi potencialisht të madh, teksa kompania Air Albania vazhdon të shesë bileta fluturimesh, ndonëse është zyrtarisht me liçencë të pezulluar.
Një ditë më parë Kapitali publikoi lajmin e pezullimit të liçencës, i cili ndonëse është vendosur zyrtarisht nga Autoriteti i Aviacionit Civil që në fillim të këtij muaji, nuk është njoftuar publikisht. Por për shkak se kompania po vazhdon të shesë bileta duke ekspozuar potencialisht mijëra qytetarë shqiptarë përballë një mashtrimi të madh, sot Kapitali publikon dokumentin zyrtar të pezullimit.
Pezullimi i Air Albania
Për të mos dekonspiruar burimi dokumenti nuk publikohet i plotë, por ai dëshmon qartë se kompanisë i është pezulluar licenca. Kodi Ajror i Republikës së Shqipërisë sanksionon tekstualisht se në momentin e pezullimit të liçencës së operimit një kompani ajrore është e detyruar të ndërpresë automatikisht shitjen e biletave.
Gjasat që Air Albania të rimarrë liçencën e saj janë thuajse inekzistente. Kapitali publikon një dokument që dëshmon se dega e Turkish Airlines në Kosovë, kompania aksionare e Air Albanias, e ka ndërprerë shitjen e biletave për fluturimet e operuara nga Air Albania.
Përmes një njoftimi zyrtar, Turkish në Kosovë ka vënë në dijeni të gjitha agjencitë e udhëtimeve se nuk do të shesë më asnjë biletë për fluturimet e Air Albanias, pas pezullimit të liçencës së saj.
“Për shkak të situatës së krijuar me fluturimet e Air Albania, kompania jonë është e detyruar t’i ndërpresë shitjet në sistem për fluturimet e operuara nga Air Albania” thuhet në njoftimin që Turkish ka shpërndarë në Kosovë.
Njoftimi zyrtar i Turkish Kosova per nderprerjen e shitjeve
Por ndërsa Turkish e ka ndërprerë shitjen e biletave, Air Albania po vazhdon të shesë bileta sikur nuk ka ndodhur asgjë. Akti bëhet edhe më i rëndë nga fakti se ky është një mashtrim potencial me bashkëautor shtetin. Kjo pasi shteti është aksioner me 10 për qind në kompaninë Air Albania, përmes Albcontrolit.
Teksa Air Albania vazhdon aventurat e saj, duke tërhequr edhe shtetin brenda, mijëra qytetarë mund të bien pre e një mashtrimi qeveritar, nëse vazhdojnë të rezervojnë fluturime me Air Albanian. Ndërkohë që asnjë institucion nuk i del zot situatës, për të mbrojtur qytetarët.
