Një 30-vjeçar u dorëzua sot në Kalamata për vrasjen e dyfishtë në Finikounda – ku viktima mbetën pronari i një kampingu dhe punëtori me origjinë shqiptare. Sipas mediave të huaja, ndaj tij ishte në pritje një urdhër arresti ndërkombëtar, ndërsa ai akuzohet për bashkëpunim.
Pak ditë më parë, nipi i pronarit 68-vjeçar të kampingut në Finikounda dhe një mik i tij biznesmen nga Athina u arrestuan pas urdhër-arresteve nga oficeri hetues në kuadër të hetimit për vrasjen e dyfishtë. Të dy akuzohen për nxitje të krimit.
Mediat shkruajnë se, autoritetet ishin në kërkim të 30-vjeçarit, i cili është mik i biznesmenit të arrestuar, pasi dyshohet se është i përfshirë në këtë çështje. Ky është arrestimi i pestë, pasi përveç nipit dhe mikut të tij, janë arrestuar edhe dy persona të tjerë për krimin. Nipi nuk pranon fajësinë.
Nipi dhe shoku i tij janë lënë në paraburgim. Gjatë mbrojtjes së tij, nipi përsëriti atë që kishte thënë në deklaratat e tij të mëparshme si dëshmitar, duke mohuar çdo përfshirje.
Ai u deklarua i pafajshëm, pretendoi se donte që çështja të sqarohej dhe se kishte bashkëpunuar me autoritetet që nga fillimi, duke përmendur rastësi në atë që i atribuohej. Nga ana e tij, biznesmeni nga Athina, mik i ngushtë i nipit dhe bashkë-menaxher i kampingut, këmbënguli në pafajësinë e tij, duke theksuar se ishte akuzuar padrejtësisht, duke përsëritur atë që kishte thënë që nga fillimi.
