Ministrja e Jashtme e Shqipërisë, Elisa Spiropali, ka publikuar foto dhe njoftim ku thotë se takuar Charles McLaughlin, zyrtar i lartë i Këshillit të Sigurisë Kombëtare (NSC), në “Shtëpinë e Bardhë – Washington”.
Por pamjet e shpërndara prej saj tregojnë qartë se takimi nuk u mbajt në rezidencën presidenciale të SHBA-së, por në Eisenhower Executive Office Building (EEOB) — ndërtesa ngjitur, ku ndodhen zyrat e këshilltarëve të presidentit, përfshirë stafin e NSC-së.
Ky dallim nuk është thjesht protokollar.Shtëpia e Bardhë është një godinë shumë më e vogël, me akses jashtëzakonisht të kufizuar dhe ambiente krejtësisht të ndryshme nga ato që duken në foto. Ajo nuk ka salla të mëdha me panele druri të errët si ato të paraqitura — elemente tipike të EEOB-së, jo të rezidencës presidenciale.
Në praktikë, takimet me zyrtarë të NSC-së zhvillohen pothuajse gjithmonë në Eisenhower Executive Office Building, jo brenda Shtëpisë së Bardhë. Pikërisht aty punojnë këshilltarët si McLaughlin.
Megjithatë, ministrja zgjodhi ta etiketojë vendin si “Shtëpia e Bardhë”, duke krijuar perceptimin e një pranie brenda rezidencës presidenciale, ndërkohë që ajo ndodhej në ndërtesën administrative të këshilltarëve.
Kjo nuk është hera e parë që zyrtarë të lartë shqiptarë paraqesin takime në Washington si të zhvilluara “në Shtëpinë e Bardhë”, ndërsa realisht ato janë mbajtur në ndërtesat ndihmëse të kompleksit presidencial.
