Kryebashkiaku i Rrogozhinës, Edison Memolla, është vetëdorëzuar mbrëmjen e kësaj të hëne në polici pas shpalljes së tij fajtor për korrupsion aktiv në zgjedhje.
Memolla u dënua sot me një vit burg, me vendim të Gjykatës së Posaçme të Apelit, për veprën penale të “Korrupsionit aktiv në zgjedhje” kryer në bashkëpunim.
Në këtë mënyrë, Apeli i GJKKO-së ka lënë në fuqi vendimin e Shkallës së Parë. Përpos një viti heqje lirie, Memollës i ndalohet për 5 vite ushtrimi i funksioneve publike.
Janë shpallur fajtorë edhe dy bashkëpunëtorë të kryebashkiakut, Blerim Xhamani dhe Isuf Tosku. Ata janë dënuar përkatësisht me nga 1 vit dhe 8 muaj burg, ku për Toskun dënimi u pezullua duke u vendosur në shërbim prove.
Pjesë e kësaj dosje është edhe Ndriçim Tafxhafa, dënuar me 1 vit burg po për korrupsion aktiv në zgjedhje.
