Ky është kopshti jo publik në një kompleks në rrugën e Kavajës, ku në datën 12 janar të këtij viti ka pasur 5-6 fëmijë të pavaksinuar të infektuar me fruth.
Në respekt të konfidencialitetit të biznesit privat, nuk do të publikojmë emrin e kopshtit, i cili ka respektuar të gjitha procedurat konform rregullave të shëndetit publik për mos përhapjen e sëmundjeve infektive, duke njoftuar vetë Drejtorinë e Shëndetit Publik të Tiranës, që në momentin kur u konstatuan dy fëmijët e parë me fruth.
Menjëherë më pas, në këtë kopsht kanë mbërritur epidemiologët e Tiranës për hetimin dhe izolimin e rasteve, për të ndërprerë zinxhirin e përhapjes së fruthit tek të vegjlit e tjerë që frekuentojnë këtë kopsht dhe për të vijuar hetimin epidemiologjik. Top Channel ka mësuar se duke nisur nga data 12 janar 2026, në respektim të procedurave të Drejtorisë së Shëndetit Publik, ky kopsht është karantinuar për 21 ditë. Madje, për këtë ka edhe një procesverbal, të cilin e disponojnë si administratorët e kopshtit, po ashtu edhe Drejtoria e Shëndetit Publik.
Instituti i Shëndetit Publik dhe Ministria e Shëndetësisë duhet të mbajnë përgjegjësi për procesverbalin që kanë mbajtur dhe e fshehin duke e mohuar publikisht, ndërsa për vërtetësinë e lajmit kujdesemi ne. Kur bëhet fjalë për sëmundje si fruthi tek fëmijët, duhet të jenë këto dy institucione shëndetësore që të na paraprijnë me informacion dhe masa, e jo të tremben nga e vërteta, e cila nuk bën gjë tjetër përveçse rrit sensibilizimin e prindërve për të shtuar kujdesin dhe për të vaksinuar fëmijët, në këtë rast, por jo vetëm./TCH
