Tetë shtetas nga Shqipëria rezultojnë në listën e anëtarëve të dyshuar të ISIS-it të transferuar nga Siria në Irak, sipas dokumenteve të publikuara në rrjet mbi operacionin e fundit të Shteteve të Bashkuara.
Lista përfshin 5 mijë e 704 të ndaluar nga 61 kombësi të ndryshme, të cilët janë transportuar nga qendrat e paraburgimit në verilindje të Sirisë drejt autoriteteve irakiane.
Sipas të dhënave të publikuara, në mesin e tyre rezultojnë:
8 shtetas nga Shqipëria
3 nga Kosova
1 nga Maqedonia e Veriut
23 nga Bosnjë-Hercegovina
27 nga Gjermania
10 nga Mbretëria e Bashkuar
8 nga Belgjika
4 nga Franca
2 nga Shtetet e Bashkuara
Numrin më të lartë e përbëjnë shtetasit sirianë (3 mijë e 544), të ndjekur nga 467 irakianë, si dhe qindra nga vende të tjera arabe, evropiane dhe aziatike.
Komanda Qendrore e SHBA-ve (CENTCOM) njoftoi se operacioni 23-ditor përfundoi më 12 shkurt, me transportimin ajror të më shumë se 5 mijë e 700 luftëtarëve të dyshuar të ISIS-it nga objektet e ndalimit në Siri drejt Irakut.
Sipas autoriteteve amerikane, masa u ndërmor për të shmangur rrezikun e një arratisjeje masive pas zhvillimeve të fundit në veri të Sirisë.
Autoritetet irakiane kanë bërë të ditur se të ndaluarit do t’i nënshtrohen hetimeve dhe procedurave gjyqësore sipas ligjit vendas.
Iraku ka kërkuar prej kohësh që vendet e origjinës të riatdhesojnë shtetasit e tyre të dyshuar për lidhje me ISIS-in, por procesi ka mbetur i kufizuar, kryesisht për gratë dhe fëmijët.
