Komisioni Europian ka reaguar lidhur me propozimin e qeverisë shqiptare për ndryshimet në Kodin e Procedurës Penale, që synojnë t’u heqin gjykatave të drejtën për të marrë vendime pezullimi ndaj figurave të larta shtetërore, përfshirë kryeministrin, ministrat, Presidentin, Avokatin e Popullit dhe kreun e Kontrollit të Lartë të Shtetit.
Në një reagim për Top News, Komisioni Europian thekson se çdo nismë legjislative që lidhet me sistemin e drejtësisë duhet të jetë në përputhje me standardet europiane dhe me acquis të Bashkimit Europian, duke respektuar parimet e pavarësisë, llogaridhënies dhe efikasitetit të gjyqësorit.
Sipas deklaratës, Bashkimi Europian po e ndjek nga afër amendamentin e paraqitur më 16 shkurt, duke e konsideruar atë pjesë të reformave që vlerësohen në kuadër të procesit të negociatave të Shqipërisë për anëtarësim. Brukseli thekson se sundimi i ligjit dhe funksionimi i pavarur i institucioneve të drejtësisë mbeten elemente themelore për rrugën europiane të vendit.
Komisioni Europian ka kujtuar gjithashtu se retorika politike që dëmton besimin publik ndaj gjyqësorit dhe institucioneve të prokurorisë është joproduktive, duke dhënë një sinjal të qartë mbi rëndësinë e ruajtjes së balancës institucionale dhe respektimit të ndarjes së pushteteve.
Në reagim nënvizohet edhe përgjegjësia e Kuvendi i Shqipërisë për të trajtuar pa vonesa kërkesat për heqjen e imunitetit të deputetëve, duke e lidhur këtë drejtpërdrejt me luftën kundër korrupsionit, një nga kushtet kyçe për avancimin e Shqipërisë drejt anëtarësimit në Bashkimi Europian.
Reagimi i plotë :
“BE po e ndjek nga afër amendamentin e Kodit të Procedurës Penale të paraqitur më 16 shkurt.
BE monitoron dhe vlerëson çdo nismë legjislative që lidhet me gjyqësorin në të gjitha vendet kandidate, përfshirë Shqipërinë. Këto nisma pritet të jenë në përputhje me acquis të BE-së dhe me standardet europiane.
Kjo përfshin gjithashtu zbatimin e reformës në drejtësi të vitit 2016 në kuadër të negociatave të Shqipërisë për anëtarësim në BE. Sundimi i ligjit dhe pavarësia, llogaridhënia dhe efikasiteti i sistemit gjyqësor në Shqipëri janë elemente themelore të procesit të zgjerimit të BE-së.
Retorika që mbjell mosbesim publik ndaj gjyqësorit dhe ndaj pavarësisë, paanshmërisë dhe integritetit të sistemit gjyqësor dhe atij të prokurorisë është joproduktive.
Siç është theksuar edhe më parë, është përgjegjësi e Kuvendit të Shqipërisë që të trajtojë pa vonesë kërkesat për heqjen e imunitetit të anëtarëve të tij. Lufta efektive kundër korrupsionit është me rëndësi thelbësore për përparimin e Shqipërisë drejt anëtarësimit në BE”, thuhet në reagimin e Komisionit Europian për Top News.
