Drejtoria e Standardeve Profesionale në Policinë e Shtetit pezulloi nga detyra inspektorin Aurel Kaziu, me detyrë agjenti i Policisë Kriminale në Komisariatin e Kamzës, pas njoftimit nga pala kosovare se ai ra në pranga së bashku me 2 të tjerë një ditë më parë, pasi tentuan të fusin nga Serbia në Kosovë 1 milionë euro të padeklaruara.
Në studion e Top Story, eksperti i sigurisë Ergys Muzhaqi u shpreh se, duke u nisur nga sasia e kapur e parave, nuk të çon drejt një grupi të fuqishëm kriminal. Sipas tij, taktika ishte e dobët dhe grupet kriminale kanë metoda më të sofistikuara për të sjellë shuma të mëdha parash në Shqipëri.
“Teknikisht nuk ka shumë informacione, ngrihen aludime të ndryshme, por mbetet për t’u parë si do të përgjigjet para trupës hetimore. Duke u nisur nga sasia e parave të sekuestruara, nuk më duket një shifër shumë e lartë, as e vogël. Grupet e fuqishme kriminale kanë metoda më të suksesshme për kalimin e më shumë parave. Një nga mendimet që më lind është se ka qenë një grup më modest, por supozojmë që janë para të përfituara nga krimi, ose droga. Duhet parë edhe rrethi që e ka angazhuar në polici. Janë gjëra që duhen parë. Duke u nisur nga mënyra sesi e ka bërë këtë aktivitet, me një makinë spontane. Mund të ketë pasur edhe një informacion. Ka shtete që ne shqiptarëve na bëjnë pak “zbor” në kufi. Nuk pyesin se çfarë ke qenë apo çfarë je. Ato pretendojnë se ka qenë përzgjedhje rastësore”, u shpreh Muzhaqi.
Profesori i kriminalistikës, Ervin Karamuço, tha se një nga burimet e parave mund të jetë e shqiptarëve që punojnë në të zezë në Europë.
“Agjenti nuk është ndjerë mirë. Ka thënë do iki, do marrë leje, komandanti nuk e ka zëvendësuar dhe janë pezulluar nga detyra. Një furgon bie në sy, Kosova e ka skanerin shumë të fuqishëm në kufi me Serbinë. Ne e kemi liberalizuar shumë kufirin me Kosovën. Ka dy linja. E para është e shumë emigrantëve që punojnë në të zezë dhe sjellin paratë në Shqipëri. Ata i kanë të ndara, mblidhen dhe janë me emra. Rasti konkret nuk i përket rastit të tillë. Janë para që kanë të bëjnë me një dorë të vetme. Nuk kanë ndarje, do të thotë vijnë nga një burim i paligjshëm. Ka linja që sjellin nëpërmjet kufijve shuma të konsiderueshme parash. Kjo është sfidë e policisë sonë, edhe e Kosovës. Nuk e dimë nëse do mbërrinin në Kosovë apo në Shqipëri. Pastrimi i parave më pas ka 100 mënyra pastaj”, u shpreh Karamuço.
Ndërsa juristi Kreshnik Spahiu, në një lidhje live në “Top Story”, u shpreh se paratë që polici po transportonte nuk janë domosdoshmërisht të ardhura nga droga, por mund të vijnë edhe nga pastrimi i parave në biznese që duan t’u shmangen taksave.
“Nuk bëhet fjalë për pastrim parash në Shqipëri, por në Kosovë. Rasti i këtij efektivi është më i rëndë, sidomos për shkak të mënyrës së transportimit të parave. Unë kam edhe tezat e mia: zakonisht, transportuesit nuk janë drejtpërdrejt pronarët e parave. Ata paguhen nga pronarët e tyre.
Në rastin konkret ka një shkallë të lartë vështirësie. Nuk është një transportim brenda BE-së, ku ka liri lëvizjeje. Në rastet e sjelljes së parave në Shqipëri, kontrolli është më i rreptë.
Sa u përket shqiptarëve, duke pasur parasysh që mund të jenë në fillimet e aktiviteteve ilegale, nuk përjashtohet mundësia që dy shqiptarët nga Kosova të jenë pronarët e parave dhe të kenë punësuar punonjësin shqiptar.
Një gjë është e sigurt: paratë nuk vijnë nga Evropa Veriore. Është pothuajse e pamundur që ato të kthehen nga Evropa në Kosovë brenda 24 orëve. Mund të jenë para që qarkullojnë diku në Ballkan.
Nuk është e thënë që të jenë para droge. Ka shumë sipërmarrës që u shmangen taksave të larta në BE. Mund të jenë para biznesesh, mund të kemi të bëjmë me pastrim parash ose evazion fiskal”, u shpreh Spahiu.
