Charles Kupchan, ish-këshilltar për politikën e jashtme në administratat e presidentëve Bill Clinton dhe Barack Obama, foli për rrezikun e mundshëm që mund t’i kanoset Shqipërisë nga Irani, pasi vendi ynë strehon një pjesë të opozitës iraniane.
Në një lidhje direkt për a2, Kupchan tha se në klimën aktuale të tensioneve, të gjitha vendet evropiane, përfshirë edhe Shqipërinë, duhet të jenë të kujdesshme.
Kupchan u shpreh se Shqipëria si vend anëtar i NATO-s do të duhet të mbajë një qëndrim mbështetës me aleatët për ta udhëhequr konfliktin drejt një rezultati pozitiv.
“Do të ishte një ide e mirë për Shqipërinë dhe për vendet e tjera që janë pjesë e Aleancës Veriatlantike që të qëndrojnë në një pozicion mbështetës, të jenë të koordinuara me aleatët dhe të ofrojnë atë që munden për të udhëhequr këtë konflikt drejt një rezultati pozitiv”, shtoi ai.
