Diskutimet për një përshkallëzim të mundshëm të operacioneve ushtarake të SHBA-së në Iran kanë shtuar spekulimet për një ndërhyrje të mundshme tokësore.
Sipas analizave, një skenar i mundshëm do të ishte një invazion tradicional, i cili do të kërkonte rreth gjysmë milioni trupa. Megjithatë, ekspertët theksojnë se mbetet e paqartë nëse SHBA ka kapacitetin për të dislokuar një numër kaq të madh forcash në rajon brenda një kohe të shkurtër.
Një alternativë tjetër e diskutuar është përdorimi i forcave speciale në terren. Ky opsion parashikon operacione të kufizuara për të siguruar rezervat e uraniumit të Iranit, një çështje që ka qenë në fokus të diskutimeve edhe gjatë orëve të fundit.
Megjithatë, një ndërhyrje e tillë nuk pritet të ndodhë menjëherë, pasi situata në terren mbetet e ndërlikuar edhe për shkak të bombardimeve të vazhdueshme.
Nga ana e tij, presidenti amerikan Donald Trumpnuk e përjashtoi mundësinë e dërgimit të trupave amerikane në Iran, por theksoi se një vendim i tillë do të merrej vetëm në rrethana të veçanta.
“A mund të ndodhë? Ndoshta për një arsye shumë të mirë”, deklaroi Trump kur u pyet për mundësinë e dislokimit të trupave amerikane në terren.
Ai shtoi se, nëse një operacion i tillë do të realizohej, kundërshtari do të ishte aq i dobësuar sa nuk do të kishte mundësi të përballej në mënyrë efektive në luftimet tokësore.
