Të ndihmuar edhe nga faktorët e riskut, goditjet në tru janë shkaku kryesor i invaliditetit tek personat të cilët preken nga këto sëmundje.
“Sëmundjet që prekin enët e gjakut të trurit shkaktojnë invaliditet dhe morbiditet shumë të shprehur dhe janë të rrezikshme për cilësinë e jetës dhe prej 6 vitesh janë në vendin e parë në botë si sëmundjet që shkaktojnë invaliditetin më të madh në botë. Qeliza neurologjike ka një ecuri që nëse dëmtohet ajo nuk rigjenerohet dhe zona e dëmtuar e trurit e humbet funksionin e saj përfundimisht. Nëse motori që kontrollon lëvizjen për dorën e këmbën humbet, ajo humbet përgjithmonë. E njëjta vlen edhe për qelizat e tjera të trurit që përfshijnë gëlltitjen, të parin, të dëgjuarin dhe nëse humben këto, atëherë pacienti i humbet këto funksione”, pohoi Eris Ranxha, shef i Shërbimit Neurovaskular, QSUT.
Aktualisht në Shqipëri incidenca është 207.7 raste / 100 000 banorë, me një nivel më të lartë tek meshkujt krahasuar me femrat.
Qarqet me numrin më të lartë të rasteve në popullatë janë Vlora, Fieri dhe Lezha.
“Zakonisht janë ato që prekin dekadat e 5-6-7, që nënkupton se sëmundjet kronike janë faktori kryesor që shkakton vuajtjen e enëve të gjakut dhe për rrjedhojë dëmtimin e trurit. Ulet ndjeshëm mosha e të prekurve, kjo edhe nga diagnostikimi”, bëri të ditur Ranxha.
Sipas mjekëve, nëse do të trajtohej hipertensioni, por edhe faktorët e tjerë të riskut, 4 në 10 persona do të mund të shpëtonin nga goditjet në tru.
“Mekanizmat mjekësorë për të parandaluar dëmtimin përfundimtar të trurit shkojnë në dy parime: parandalimi që nënkupton trajtimin e të gjithë faktorëve të riskut që çojnë në këtë pikë, siç është depistimi për të zbuluar aritmitë e mundshme kardiake dhe evidentimi i sëmundjeve dhe trajtimi i tyre, dhe këtu kemi hipertensionin, diabetin, jetën sedentare, abuzimin me preparate dhe substanca, duhanpirjen”, tha ndër të tjera mjeku Ranxha.
Raporti kombëtar i ISHP ka nxjerrë në pah se goditja në tru është e rrallë tek personat nën moshën 40 vjeç dhe kur ndodh, shkaku kryesor është tensioni i lartë i gjakut. Sipas OBSH çdo vit, 15 milionë njerëz në mbarë botën pësojnë një goditje në tru./ Tv Klan
