Mungesa e Elisa Spiropali në seancën parlamentare ku u votua për imunitetin e Belinda Balluku duket se ka hapur një debat brenda radhëve të Partisë Socialiste.
Spiropali nuk mori pjesë në atë seancë, ndonëse grupi parlamentar socialist kishte marrë më parë një vendim politik për mënyrën e votimit. Pas kësaj situate, kryetari i grupit parlamentar, Taulant Balla, deklaroi se vendimmarrjen për këtë çështje nuk do ta marrë i vetëm dhe se do të mbledhë grupin parlamentar për një diskutim.
Reagimi i Spiropalit erdhi publikisht dhe në mënyrë të drejtpërdrejtë. Ajo i shkroi Ballës se është dakord që çështja të diskutohet në grup dhe e ftoi të thërrasë mbledhjen pa vonesë.
“Taulant, e lexova me vonesë një deklaratë tënden publike. Jam plotësisht dakord. Nëse çështja kërkon konsultim me grupin parlamentar, atëherë është pikërisht ajo që duhet bërë pa vonesë. Thirre grupin dhe zhvillojmë një diskutim të plotë”, shkruan Spiropali.
Në mesazhin e saj ajo thekson se vendimmarrja kolektive është forca e grupit parlamentar dhe garancia e legjitimitetit politik, duke shtuar se çdo qëndrim që del nga një diskutim i hapur meriton respekt.
Debati vjen pasi kryeministri Edi Rama duket se ia ka lënë përgjegjësinë për këtë çështje Ballës, ndërsa tashmë pritet nëse grupi parlamentar socialist do të mblidhet për të diskutuar mungesën e Spiropalit në votimin për Ballukun.
